გათანე, გჷმათანე
ალიონიე – ყურდგი ალიონი...
ოშქურანჯიე თე სიყურდგა ჯერღვის ყინუნც...
პიორც გითოკვეტელ კაკაბი ცვათი დო ცა თოისერი კარკაცა რე ბჟაშ ელულაშა...
შორც – ცაშდალუს ილანტ მუნაფა...
სი, ჩქიმ გჷმათანე, სი მიქკოჯინექ პრიველო...
სქან სჷნთე მუდგარენ ღორონთიერიე – სინთეშე უმოს სინთიერი...
მოშქურ, გჷმათანე...
გოძირა ხურხის, გოხვეწუქ...
თოლც მიბარჯღუნც ჩილამურიშ ჭვათი დო სქან ჩხორია კინ ბარჩხალია მურიცხიე თი ჭვათის...
სქან სჷმშა მიღუ იმენდი, მეპუნქ თის დო ვორწყექ: ქინიპუროსქ უჩა მუნაფაქ ყურია პოპორც...
სქან ნძალი უზიმურე, სიკეთე – უხურგე...
სი, მითაჟამშე ჩქიმ კათას იმენდი რდი, გჷმათანე;
სი, თუთა დო ბჟა...
სი ქუგუგალე, გჷმათანე...
იშეიშენ სი მუშენდა სი იჭყა გოთანას – ირიშ მათელებერი ჩხორია ბჟაშ ელულას...
გათანე გჷმათანე...
გათანე,გათანე, გათანე...