გერი დო კჷრჷბი
ართიშა ჭიჭე კჷრჷბის,
ჸუმენქ აჸუ, სინჩხე რდჷნი,
მალ წყარიშა ალელჷ დო,
წყარიშ შუმა ოკოდჷნი.
ჟიმოლეშე ეკაჯინჷ,
გერი ქოძირ ალარდჷნი,
ქიმეხვადჷ საწყალც ბედი
აკოჭვილი აფუდუნი.
უეცარო შურქუ ქანთხჷ
თოთო ხორცი უჸორდჷნი,
გერცჷ ხუჯიქ ქოუგჷნ,
წყარც კჷრჷბი ინორდჷნი.
ოკიბირალჲ ვეშუკონი,
გერცჷ შეულებუდუო,
ჭაფურიაქ ქაშუოლჷ,
თის დეთხიებუდუო.
გერქ ეუძახ, სი, მაზაკვალჲ!
მუჭო ოძღვირინანქჷნი.
ჩქიმი კანონც ვაურჩქილექ,
დეგეკუნტორ რინაქჷნი.
"ჩქიმი ტყასჷ ანადგურე,
ჩქიმ ადგილიშ წყარც შუნქუ,
კუჩხი იშო ქინოიდგჷმუ,
წყარც ხოლო მილანდღუნქჷ.
"სქან უწინდურ ლეჩქვეფითჷ
სუფთა წყარც მიწიკუნქუ,
ყურე, გირაგადჷქჷნი,
ჸუცუ ხოლო ვეფართხჷნქჷ."
-"მუ ზოჯუა რე პატჷნი,
მუს მაბრალე, მა საწყალსჷ?
თქვა ჟიმოლე - მა თუდოლე,
სოლე გილანდღუნქუ წყარცჷ?
"წყარი არძა დჷკე ურცუ,
თაშ გარჩქინჷ ღორონთქჷნი,
ჩქიმ ნალანდღვა ეკე ურცო,
თეშენი რე მინჭყორქჷნი."
"აბა ტყურას გიგონენქო,
უჯგუში რე გაჩერდენი,
გოწოხ ვორექ ნაწყჷნეფი,
გვალო მართალ გიწუენი."
-დიო წანერ ვავორექჷ
გოწოხ სოლე დომიდგჲ მახე?
-აბა სქანი ჯიმა ჸოფე,
გვალო თიშა გიგჷ სახე.
-ჯიმა ვაპუნც ჩქიმ პატჷნი
ტყურათ მუშენ გებდვა ბრალცჷ?
-სქან მოგვარე იშენ ქორდჷ
გინოგაფა ოკო ვალცჷ.
"მობწყჷნდი სქანი რჩქილას,
პეტელანქჷნი გობაღჷ,
ხორციშა მაფუ გურინი,
მიზეზო თინა მობაღჷ."
თქუ, დო ხათე ქჷმკიჸოთჷ,
ტყაშ მიდეღჷ, საწყალი
ჭიჭე კოც დიდ კოჩიწკჷმა
მუჟმც გორთჷმუ მართალი.