გოკურცხი კოჩი
ქითოფორჩე ფურცელი...
ყინჩიშ ვარჩხილით გოქანჩელი თოთო დო ლეჟერი ღერია
ელ მუშ გინოთირაშე ეთანაფას...
ხარენც დო კუსანც მუშ მენჭაფას ჟირსახობა კოჩანიერობა:
მუჭო გეიარკ პრიველი გომბელუაშე ვითოჟირი მილიარდი წანა,
ხეს ქუჩუჩასკილადირო, გორისინაფილი, ონძილეშე
გითოციმილი აფენთებული ჩხომეფცალო დო ოგვაჯეერღვაფილ
ბუტუტიეფიშნერ ერია–მორიათ დო შიშით გოსკილადე
დილემათ: ღურა ვარ თელა.
ოდო მუში ჟიცაში სიკაბეტა დო ფოლოში სიდაბალას
შურმალაფუო გორჷნც გერგეზეფს – პრომეთეს, არამხუტუს,
ამერანც, მუდა, მუდგა დუდი გულუანი, კოსმოსიშ ოზეს ოსარკე
განჯანი დო ორთეშ ოპონუეფიშე ალგილუა გადინუანინი...
დიოხოლო თელიე წამება შურონთხეში, ჯოჯოხეთის
მაზაკვალური დო შურუბადო დება–ნირზიში...
მუშ კოლაფსის მარდურე ულუ ასაშ ქართას ინოკილერი ორთე,
ირო რსიოლც ასკილადირი.
მარა გვალო ლჷლჷრე ეყვინთელერი სითელე, უმარდულო
ყინჩის ყალეფით გოკილადირი
ვართ ხოლო ომორდუალეშ მეკიჟინიშ გეშა აბორჯებულო დო
მურუჟო, ივარ ვორწყექ კარაკანო: დიხა ელმერთუ...
თოლიშ ცჷმც ბჟაშ სინთე შქირტუ , შქირტუ ოდო ინწყუ დო
ირთუ ორთე უჩა რხვილიშ ყურია მართუს...
თოლიშ კაკაბია კურცხალეფით, შურ დო ხორციშ უჩურცხუ დო
ირიათოიან ნირზიშ გეშა, მენგარელ–მებირელო ქოთ ელ დო ქოთ
ვარ კოჩანიერობა დო მიაჯინე მუშ ღურაშე ეთანაფას...
p.s. რსხება თხულენც დუდიშ მუკორჩქინას ვართ ხოლო ტომბა ცას მურიცხეფიშ ცირცინით, ივარ მუჭოთ უღურალაშ წამალი ირონი, ოლაფარესჷრე: კოჩიქ ოკო გეკურცხას...
მენჭაფა – მისწრაფება; ოპონუ – საყრდენი; ალგილუა – ხანძარი; შურონთხე – სამოთხე (შურ + ონთხე – სული + სუფევა = სულის სასუფეველი); ჯოჯო–ხე–თი = ჯოჯო"მეგრ. ეშმაკი" + ხე "სულდგმული" + თი "ადგილი" = ეშმაკის საარსებო ადგილი: ასა – პირველი პირისკენ მომართული სივრცე: ყინჩი – რთვილი: ცჷმ – ცვარი: ორთე – სამყარო: უჩა რხვილი – შავი ხვრელი: ეთანაფა აღდგომა..