გოლურ კვინჩა
არძაშ უმოს უხურგე მოღალატე, დუდიშ
მოღალატე რე.
გოლურ კვინჩა,
გოლურ კვინჩა,
ქიფიქრიო აკა მინშა;
აქ მორთინი მუს ორწყექ,
ვაიჩქ სონი სკუა რექ.
სქან ქიანას, თიშ მახოლა რდჷ,
გახუტოლედჷ ცა გურიშა,
ჩხანა მოგიჭანუანდჷ
ხვართქალი დო ხურთქინიშა.
გერეშ–გერე, გერგე გოლა
სჷმეფს ეუტურუანდჷ,
მაფურინეთ ფსუალეფს
ცაშა ეიტყურუანდჷ.
ეიორჩქინუ დოტებულც
არძა ჭუა გიანტირე.
არძაშ უმოს მოღალატეს
კინ მუშ დუდიშა არტინე:
აქ მორთინი სი სო რექ,
ჩილათირ შარას გერექ.
უშქურდიო წვათაკონკშე
შალარამი კამარას,
ტკილშე ეშე ეხარცქილ
კალმახამი შამარას.
გოსისმარჷ კირდეშ ქირი,
თიში თოლეფი რიჟინა
დო ხელერდო ულირ თირი
აშო ეკკოკიჟინანც.
მარა აქი ირ ფარანც
ლანდღვე მალჷ პარანანც.
ბუცუცია კურკუცია
ცაშ სიხოლას ივარანც.
მოდარანჯუ მუქუთ ფალუ.
ვართ კანკალა მალუეფს
ჩხურპატარა ინიპალუ.
ფერდის ია–ია ინწყუ
ცხენი აგაფაში ტორით,
ჭალეს დოლოს პეულამც
დოგრინჯჷნა ტრაქტორით.
მოგისირეს ირი რჯულა
დაიეფი ზესნახე…
აქ კოჩი ხე, კოჩი… კოჩი…
ჸასჷთ კოჩი გილახე…
გოლურ კვინჩა, გოლურ კვინჩა,
ქიფირქიო აკა მინშა,
აქ მორთინი მუს ორწყექ,
ქიჩინ სონი სკუა რექ!
ვარ, გოლუა, სკანი ამბე
შურო სარხოს ვამოხუჯ:
აქი დაჩიჩიებას
ქირც არაგვე თინა უჯგჷ.