გოტიცონილი
კოჩი, ოზჷრეწკუმა (ბაზართან) ხოლოს, ჩხოუშიას ქალარჩვეს. ღვარუ ცოდაქ: "ვავაი, ქიმმეხვარით - გობრჩვესია". ქუმოცუ კათაქ დო მუს ორწყენა: ტაცალე კოც, მოპურახილც, ხელეფ ოონჯღორე სჷმანეფშა (ორგანოებზე) ქაწუფორუაფ, ქიგერე დო ქოღვარანც: "ქიმმეხვარით, ქიმმეხვარით, გობრჩვესია."
გაკვირებულ კათაქ იკითხ: გვალო ათაშ გურჩუთუ დო გუტიცონუთუნ ყამა ვაიღუდუაო?
- მიღუდ მარა მიდამღესია;
-ლეკური ვაიღუდუაო?;
-მიღუდ მარა გეგლმონწყესია;
-ტაბაჩა ვაიღუდუაო?
-მიღუდ, გვალო მოველირი, მარა გემოდირგესია, ეჭყვადილეფქ.
თქუ თენა დო დუდშა მინჭ ხელეფი. გვალო ღვარღვალია ჩილამურეფი გოუტუ თოლეფიშე. მუ ჩიჩურქ მაღოლ დო მუშა მიდგუდასია შური... კათაქ მუჭოთ ოართეთ ჩინებულიენ, ბრელი იბუძოლ, იგორგოთ; მინქ თენა თქუ, მინქ თინა; მინქ თენა ქუმმნაფორ, ცოდა კოც, მინქ თინა. ინა იშენ ინგარც დო ღვარანც. ინწკუმა ჩეში გჷმათირალიშ გუმმაჩამალქ ონჭუეთ ირულ დო კურთა დო ოსარე ქუმარულაფუ. ენა ძირეს2ნ არძაქ ირულ მუშუშ ბარგეფშა (ოზჷრეს მუ ვაძ). ბელასჷმ (დიდებული) ბარგეფი ქაჩუქეს, გაგმოშიმბეს დო გაგმოდრანგეს.
ე ჸაზაყი იშენ ინგარც, თოლც კაკაბია, ნანდული, ჩილამურეფი მანტუ დო თვალუნც: "ვავა, ჩქიმი, ბეთვერია, ბაბაიეფი, ჩქიმ ზესნახე სკუალეფია - :თქვან მადვალარ დო მუკაქუნალიშ ოჸიდე, ვით წანაშ ნაზირა, ფარა მი უღორონთეფქ გემოსოფუა. მა ზურაქ, ჩქიმი ჩულაღიობაშ გეშა, გოტიცონილ სკუალეფს მუჭო ინვოჯინავა თოლეფც".
კათას გურქ ერჩქალ. მინც გვალო ღვალეფც ჩილამურიშ კურცხალიაქ ქალაჸუნ. ქუდუჭყეს ფარაშ ჩუქება. ოზირეს ჭიჭე ფარა იშაყარუდუო. ცოდა კოჩქ უღუდუნ თიშ უმოს ფარა დოშაყარუ დო ხოლო უმოსი ოყიდარეფი ქუჸიდ მუში ჩილ დო სქუას... თე არიკი სი გოხუ მარგალი:
ვაიდღანუქ ყამა, ლეკური დო ტაბაჩა მიდაიღესუნ, მარა ონჯღორე ხომ ოკო ქოიჩქუდას თეშა?...
ვარა გოტიცონილი რექუნ თეს ვარწყექუნ თენა თოისერი ვარენო... ორწყექ დო თეშა ონჯღორე ვაიჩქუდა - ენა ხოლო უარესი გასაკვირი ვარენო. ვარა, სი უვაიჭარე, ოლიმეთ გურ ვენორძ დო ზურა რექუდა გარა დო თვალუა ვარა სქან ხესჷრე. ვარ თეშა ხოლო გოშქურუნო სი უჸვაიჭარე, სი...