გოფაჩით დღალეფი
გოფაჩით დღალეფი
დო პიორეფ დოხვამით.
გოფაჩით პიორეფი
დო მუსიკას ქოუბირით.
ჯგირო თელეფ ქორდათ დო
ონჯუაშ ბორია გასიმეთ.
ქეკაჸუნით თქვან ხონარეფც
დო ბჟა პიც გიბონსუნ,
პეულიშ ცუნდიშ სიწკონდარე
ქოთქვით.
სარკეს თქვან ამნახანტი
მუ მაგორაფალ რე
სიმონკა ქიგინით-და...
თოლი მუშ მასქვამა ოხვამე რე,
ქიხვამით თოლეფშო.
თოლი ფოქვი ვა რე,
ალტამირაში,
ხანტუა დუჭყენი,
დიტუე დო ირიათონც აშაბარენი,
თოლი ოხვამე რე, დიდი ოხვამე.
უმოღე ზალამეფი მიდგას
ანწყუნი,
თინა ხოლო თოლც ანწყუ.
თქვან მუკ-მუკი მუთ რენი,
თინა გოფაჩით,
მიშელით შკაბან აკანშა დო
გურშე ქიბირით.
მითინ დო მუთუნ ვარდათუნ
ხოლო,
ქუმგოჭირინუანა
უგუწყანე გაშინალს.