გოჯოგაფილ ჯიმას
(აფხაზ ჯიმალეფს)
მუქ გაღოლ მა ღურელი,
გომიჯოგენ, ალალი ჯიმა,
ხომ ქარწყექ კაღუ რენი
დიდი ლუბეში ალაჯინა.
უგუცხონტუ ბინეხცალო,
ტანშა მაფუქ გუნარდუა,
ასე ტერიში გაძიცალო
მი სანგაროს იმარდუა.
ათომჸურშუდი ირო ცაშა,
ოხვამერი ცხვაცხვიცალო,
მეგურაფილქ ჸოროფაშა
მუშენ გინმართი გინარგალო.
სქანი ჭიშკარს ირო თხილანდ
ჩქიმი ლაფშაშ შირილჲ ნალი,
მუს მოიღანს ჩქიმი ჩარცხა,
გორგილაფირ ჩხე ჯარგვალი.
გოიტიბუო შხვაში ოროქ
გოჩიჩეფენ ტერიშჲ ყამა
ართო მორდუში ლაკვეფ ვორეთ,
ართ ლაგვანშე ეშნახვამა.
დორხენდუო დიდ უღუქუ
ვაგარჩქილენ სისა – ტურა
ოგვაჯამო მეუღუქუ
წკუნწკი მელას ჩქინობურა.
მის ათუდვი კილით ჭალი
მი ეკოიჯან უჩა ზღვაშა,
სონ ტიამეფჲ კულეჭანე
ღორონთიში აბარწაშა.
მაჭარცალო მიგოფუნქუ
მარა იშენ, ვაიღუ კურცხა,
დიდი კაცხუს მუკობუქუ
ბირცხაცალო აკაბურცხა...
სი თინწკიმა დორნწალესჷ
ჭა დო ფურჩათ სი ქაბულა,
დიდა ნინათ იწამენი
გულიაში ნაძღაბულა.
ვაჭყოლოფუდ მელენი ჭალე
ვამანჭჷდჷ ჭვილს ფაჭაჭი
მელე მინილი უაიჭარექ.
ჭე ვაგმიღუ კობ კაჭიჭი.
საონჯღორო მოჭენა დო
კინ ქუგობდვათ ტახილი ხინჯი.
ჭყოლირ ჯიმაქ გახოლი დო
ჯგუნჯგიცალო ქალმაბიჯი.
ჯვეშობურო გისვისვინე
საჯიმალო მაფში ჭირქა
ჩქიმ ჭკიდიშა კინ ისვინე
მოსანწალერი სკან აჯიკა.