გრანელიშა საჩიარი
ლადოს ყაყაჩო დო ტიციანს ჩხე მიხაკჲ,
ირო საკვარჩხო რდჷ სკანი ღანკჲ.
შური გურქვინჯიშა ქინიკაკჲ,
ბედი ძათანძალო აკიკვაკვჲ.
ანწი ოსოგოთე იკვარზალე,
მუ რე გოხვარუნ უჸვაიჭარე.
მუჭო გელარსქირაფჷ ჩილამურჲ,
თაშ დუდმუკონგარილს მუ გაჭარე.
აკა ქჷგმაგონჲ მარგალურო -
„ჩიტიქ გეგნოფურინ ჸაშე, ჸაშა“.
მი ჭყელქ მითქოკართ თე ქართის,
მოლა აფანია წენდიხაშა.
ჭუმე თანაფა რე, ხომ ქოიჩქ -
ლაგვანს უსკანეთ ვამანჭყანა.
ჭარა მუგორენო ხუჯჲ ემრთინჲ,
მოლა, მოლეჯუმე ხეშ ნაჭარა.
ქოიჩქ, ჩქინ ხელობა ჭყელი რენ,
ლერსი ეშმაკიშჲ კაღუ რენ.
მუჭო წარღუზილ მიჯინექ,
მუთუნ გოწყინეო მა ღურელჲ.
ლერსიშ მათ მოსურ პატონეფჲ,
მონტუ ბერწული დო ჩხე მიხაკჲ,
მოლა, ჭითა კვერცხეფჲ ქოფცხაცხათ,
უკულ, აკა ჭირქა ქომიხაკჲ.
მოლა, ცა მორღია წენდიხაშა,
ქოიჩქ, მუ კვანთჷრჲ დღახუ რენ.
ქეშაფჭყოლადუნო მარგალურჲ,
სო რე გეფსქიდინ, მა ღურელჲ.