დავითიშ ნაბირა - ზუბოვკა (დავითიანი)
ზუბოვკაშე აშომალქჷ, ბძირი ართი ძღაბი,
ერიანი, ართო სკვამი, თოლიშ გოსოფჷ ძაფი.
უჩა ხალით ჩელაია, წარი გინორტყილი,
იში ებრიქ აკოპტახუ, ვენშამიტუ ჸვილი.
ბკითხი ბჟა რექ, სოლე მოულ, ანწ სო ულუ ვარა,
რთხულე თესჷ ქუმორჩქინი სკანჲ გეში დო შარა.
გურჲ კოდორო გინორთელე, გოსალისე თინა,
წყარჲ ქიგმობ დო დოშკირიტი სკანჲ დაჩხირიშჲ ნინა.
სი ჩიჩიე, ვაგე კოჩი, მუ გამბედი მავა,
ჩქიმი ხეში თხუალაშენ, დოისერე დღავა...
მაფშალიაშ მანგიორო ქუმოკონო ყვარანი,
გვიგვილერი ვარდიშ პეულქ ქუმოძირჷ ორანი.
ჩილამურიშჲ ზღვა დუვობი, დუდი იბჭყე ჭვილი,
იქჷ მიწუ ვამკონია, სკანჲ ბჯოხოდას ჩილი.
სკანჲ უჯგუში მიჸუნცია, ქომონჯი დო თარი,
ათე ზიტყვაშ გაგონა დო ჩხვინდშე ვობი ძმარი.
ქუმოურთუმ ეკონიას, ვალც ათაში იგა,
გეჭოფუ დო დუც მომინჭჷ მუში მონკა ბიგა.
ქაწმასერჷ დო ეკიბრთი მივოდინე იმენდი,
მარა იქჷ ქიგმოდირთჷ მუჭოთ სინთეშ სიმეტი.
სიაბარაქ დუმართუნი ხე მობკიდჷ, ქუმომფერუ,
მიწუ, გაღას თე ღიაბიქ გვალო თაში მუთჷ მერუ.
მა უგამი, სქანდე ვორექჷ ათაში გაშერებული,
გური მაფუ მენკირილი დო მერეთო ჭვებული.
ისჷ ხოლო გაძიცინ დო ქიგნომისუ მა ხე,
თაქ არგამათ ჩქინიცალო ათაშ მითინ ვახე.
ანწი ქუჯგუ გებდირთათჷ, ჩქინი შარა ირთუ,
ჩქი ართიანც ხოლო ბძირუნთ, თენა ვამოჩირთუ.
სო იდუნი უკულჲ ვამიჩქ ქაწმოდინუ თოლო,
მარა მა ფშუ დომიჩინუ მოულია ხოლო.
სახიოლო მუ მაღვენუ თეშ უმოსი, ჯგირი
თიში მარდის უღალუდას ჩქიმდე არძა ჭირი.
მა ვორექჷ თიში ჭკორი, თინა ჩქიმი მინჯე,
თიში უმშო ჩქიმი რინა გვალო აკოქინძე.
ღურუს ველუქ, ომაღურეთ კინ მოფთხოზუ ჭარა,
ვაბძირინი ეთი დღაშე ვემემტებუ ნგარა.
ჩილამური რეხო ვობი, გვალო ვოქურჩინე,
მუჭო მოკო ქობძირენ დო ქეშეფხვადას კინე.
ვარა ზისხირს ქოკათაფუ ართო ნჯღელი წყარი,
მივორექ დო გომინჯასჷ თიქ სამონთხეშ კარი.
მოინალე თიშო ვორექ, უჯგუშ მა მუ მაში,
უღურუშ წყარს ქობჩანსჷ დო ქობალს თელარაში.
ღორონც ფთხულე ვოზნახუქუ, სი ქიმმეხვარ ანწი,
ჩქიმ გურშენი დოჸვილეს დო ქიგურინეს რანწკი.
თიშ მასკვამა, გოსოფური, მითინ მაჸვენუნო,
ვარა ათე ცა დო დიხას, თიშ მანგური რჩქუნო.
ხეკირილი კუჩხით ლახეს, ჩქიმი გური დონწყვე,
ზისხირამი აწომირე, ჩქიმ თოლეფი ორწყე.
ნანა, მუჭო დომიჸვილეს, მუჭო აკისოფეს,
ასე შორშე უჯინექ, ელვონგარა სოფელც.
სი ჩქიმ სკვამი ჸოროფილი, სოლე იდი სოლე,
სკან უჯგუში მითინ ვარე ვართ მელე დო მოლე.
მა გარამცჷ ქინოფსკიდი, სკან ვაბძირი ციონი,
ბირგულც გიშკვა, ვადომტუა ცაშა გეშამიჸონი.
მა გარამცჷ ქინოფსკიდი, სკან ვაბძირი ციონი,
ბირგულც გიშკვა, ვადომტუა ცაშა გეშამიჸონი,
ბირგულც გიშკვა ვადომტუა ცაშა გეშამიჸონი.