დავით ჭითანას გვანჯიშე
კეთილჲ გური მოჯგირეში
ჭიჭე საქმეთ იჩინებუ.
გურს ჸოროფა ვაიღუნ-და,
თეზმა ჭარუა ვეშილებე.
თეშჲ მაჭარალჲ ჩქიმი საქმეს
დიდ ხანიე ნოკვირუე,
შორიშე დო ხოლოშეთუ
არძოს ართო ნოძირექუ.
ოღონდჷ ბრელი ჸოროფათუ
ნამეტანი დოგიცქვაფუ.
პირადჲ ჩქიმი ოცქვაფალო,
დიდი ლექსი დოგიჭყაფუ.
მანგიორი გინოგიგე
მათი თეშა გური მაფუ.
სქანი დო ჩქიმი ჯიმალობას
ხიდი გოძუ უძირაფუ.
სოდეთ გური ქოგურენსჷნ,
მთავარჲ ვარე, მაფუ–გაფუ.
ნათესეფიშ გორუასუ
ირკოჩი ართო მიშეფაფუ.
ირკოჩიშა გისხუნდასუ,
წმინდა გური მისუთ აფუ.
სქანი მეტი ბრელჲ ვანოპვე
მოჯგირე დო მოკითხაფუ.
ჩქიმი დუდიშ გოშინაშენ
ძაფ ჩონგურშა ქიგეიგაფუ,
საზანდარიშ მოლექსეშა
დუდი ქოგიგურუაფუ.
ჩქიმი გური სკანი ჸურე
დოსქიდჷ ირო უწყინაფუ.
მეტიქ მუთუნქ ვაკმანწყუუ,
ტვინსუ ბრელი მიშებაბრჯი,
დიდ მადლობას გიჩინანსუ
სქანი საიმენდო გვანჯი.