დაჭყაფური
1.მიქუთ გარჩქინ ქიაჩინი ძალით თიშე შემლებერით,
ჟინმარენჯეფ შურშე ქოჸუ შურიშ ნბარათ ჟინიერით,
კათეფს, ქომჩეს თე ქიანა, ეუთვალუ ჩქინენს ფერით,
ეთიშე რე ირ დადია, სახიერო თიშიერით.
2.სახე ირნერ ტანიშია, ჰე, ართ, ღორონთ, სი გარჩქინი,
სი დოფთხილე, ქომუ ღონე ეშმაკიში გესარჯგინი,
ჸოროფაში ქომ კორინი, ღურადღაშა დასაკინი,
მოქექაფა ცოდაშია, ოჯუმალარ იშო კინი.
3.ოსქვანს მისუთ მოხვარება, ჯილოს, შუბიშ, ფარ-ყამაში,
მეფეში ბჟა თამარიში, თუმათ ხოჭო, ღვათ ღვიფაში,
ვამიჩქ, მუჭო ფშქიდუენი საშქიდარი ის, ცქვაფაში,
გიშნაგორა გითმაჯინეფს მურთვებუნა ჸინი ჸვაში.
4.ზისხირიშ ფას მიხენანი მოცქვე ვორდათ თამარიში,
ოსხუნური ვანოჸვენა, მაცქვაფური ვორდე თიში,
გიშერ-ტობა მომელან დო მოპერ ქანცინ მა ნაიში,
ლაბაშათუ ხირატილი გური თეშე ნარჩქილიში.
5.მიზოჯესუ თინეფიშო ქოფთქვიკონი ნე ლერსეფი,
ოცქვაფალიდ წარ-ფიჭვეფ დო თუმა, ლერჩქვ დო კიბირეფი
მეჸუნელო მენწკარილი ბროლი, ლალო, თოლირეფი,
ლიბ ტყვიაში ქულამურსუ ქუა უტახ მანგარეფი.
6.ანწ ნინა დო გური მოკო, მოხელუა, გეფთქუენი,
ძალ ქომუ დო სქანდე მიღუ ნწია, გინა ქიმებჩენი,
ტარიელიშ მოხვარება ზინთხას ოკო ფშინუენი,
აჭკორუნა ართიანსუ, ფთქვი, სუმ გერგეზ რჩელაშენი.
7.ქუდოვზოჯათ, ტარიელშო ჩილამური მობრწიმუნა,
ეთიშნერი სო მი ჸოფე, ვერჩქინელე, ვემრჩქინდუნა,
რუსთველ ვლერსა, გურშა, შოთა, მუ ლაბაშა გემბინუნა,
ნათქუელი ანბეთ, ანწი მარგალიტო ქუდომწყუნა.
8.მა, რუსთველი ხელუათუ, ათეს ვორთუქ ათეშენი:
ჯარს დუდენსუნ თიშო ბღურე, თიში ვორექ მეუფენი,
მიბჸვანთ, მიბღონ, მიჯნურეფშო წამალ ვარე მოხვარენი,
ჟირშე ართი მიჩქ მაჩენი, არსხა, ვარა სამარენი.
9.შურს ოხუტოლ დუდჯარს ანბე, დივლაზურე განმიკინი,
რგებუ ონბოლ მარგალიტო მობათვალი ხე-ხეთინი,
მინშო საქმე საორჩანო, ვძირ დო ლერსო გინივჩინი,
მამეუფუნ თიქ გამრჩიას, ხეს დო მუ სკვამს, აშუდვინი.
10.თიშ უმშოთი, - უკულ ვარი, უჯგუდ თოლეფქ იჸვერკონი,
აჰა, გურქი გუჸოროფუ, სარზენბედოს ქუმწოლკონი,
მიხვეწე მი, ხორცჭუალა ბაღუდ, შურეფქ ჩხონდუკონი?
ფერ-სუმიში მაცქვაფურქუ ლერსო ოკო გილართკონი.
11.ბედო, მის მუთ გუოლუნი, ჯერდანი დო თის ერგანი;
მოჩხუპარეფქ იჩხუპანი, მოხანდეფქუ იხანდანი,
მიჯნურეფსუ მიჯნურობა უჸორდან დო უჩქუდანი,
ოწონებელქ ვეჸუანი, ვართი შხვეფსუთ დუწონანი.
12.შაირობა, აკათ ჭკვერშე ართი დარგო დაკებული,
საღორონთო, მარჩქილარი, მარჩქილეში შერგებული,
ათაქით ნეთ ქალუწენსუ, კოჩ ქორედა ჸუჯ-რგებული,
გინძე კუნტას ირაგადე, შაირ თეთ რე ჯგირებული.