დაჭყაფუ (გინმათანგალი კაკა ჟვანია)
მიქით გარჩქინ თელ ქიანა : მუშ მანგარი ღონეთჷნი
მუშ გორჩქინელს ირფელს ცაშე : დუნბარ შური დინუდგუნი
ქიანა უკოროცხ ფერეფით : ჩქი მუჩესჷ მიქითჷნი
თიქ ხენწიფეფს მეჩუ სახე : თინერ მუშის მოგენდუნი
ღორონთ ართი თქვა მეჩითჷ : ირფელს მუში სახე ტანი
მა ქომუჩით ეშმაკისჷ : მევერუენ თინერ ჭყანი
ვეშემსუსტა მიჯნურობა : ღურადღაშა ქუმაცალი
დამიქექი ცოდეფ ნამუთ : ღურადღაშა ქუმაცალი
ჯილოს ნამუსჷთ ოსქვანსჷ : ხვარება ფარ დო შუბიში
ღვა ჭვიჭვალი თუმა გიშერ : ბჟამაფაში თამარიში
მუთ ბშქიდუა მუჭო ბთქუა : ოსქუნ ფერი ცქვაფა თიში
ირფელ ჰამო ჯგირობუა : მით რე მიმაჯინე თიში
თამარს ვოცქვათ ხენწიფესჷ : ზისხირამ ჩილამურითჷ
იში ცქვაფა მაფ ნაჭარა : გიშნაგორა სიტყვეფითჷ
ზღვა გიშერი მელანითჷ : უსქირაფუ კალამითჷ
მარჩქილეფსჷ გურ დაჭყოლუ : თენერ ნწარე ანბეფითჷ
მიზოჯესუ მა ჭარუა : თიშო ჰამო ლექსეფიში
ცქვაფა თოლი ფიჭვ-წარიში : თუმა პიჯი კიბირიში
ლასტურო მოჸონაფილი : მერანწკილი ართიანიში
მანგარ ქუასჷთ ტახუნსჷ : ლიბუ ტყვია ურო თიში
ასე ოჭარალო მოკო : მონდომება ნინა რჩქინა
ღონე ქომუჩი ქიშმენწი : აზრი სქანი გუნარჩქინა
მივეხვარათ ტარიელსჷ : სქვამას ოკო თისჷ შინა
სუმ ქომოლსჷ თუთაშნერს : ართო უსხუნუნა რინა
მორთ დობზოჯათ ტარიელიშო : წენს ჩილამურ უსქირაფუ
თინერ დაბადებულიში : მითინ ვარე მაძირაფუ
მა რუსთველქჷ თიში ანბე : ბლექსე გური ჭყოლირ მაფუ
თეიშა ანბეთ ნარაგადა : მარგალიტო დონწყილ მაფუ
ათე ანბე სპარსული რე : თანგილ გინოქორთულერი
ონბოლ მარგალიტიშნერო : შურს მიკმატენს ირკოჩ ფერი
ბძირ დო ლექსო გინუოჩქვი : მიჩქუ საორჩანო რენი
მიშო იბხანგებუქჷნი : თიქ გედვასჷ განაჩენი
მა რუსთველი ეგებ ბჩირთუქ : იშენ ვორთუქ თე საქმესჷ
მის მორჩილენს ჯარ ქიანა : თიშ ჸოროფა მახანგენსჷ
დებსუსტ მიჩქუ ჸოროფილს : წამალ მუთას ორგუ ბრელსჷ
ვარა მირხსხი ვარა ჩქიმი : დუდი დიხა სამარესჷ
ჸვერეს სინთე დინაფილსჷ : ონატრ სინთექ დართასჷნი
გურქ გემიჯნურ ბედო რგებუ : მინდორს გილერულასჷნი
ქეშემწყნარით მა მითინქჷ : ჭიჭე ემექექასჷნი
სუმი ხმაში ობირეს : ლექსი ოკო რჩქუდასჷნი
ბედი მის მუს მეჩანსჷნი : თისჷ ოკო გეჯერდასჷ
მოხანდექ იხანდასჷ : მალიმარი გურამ რდასჷ
ჸოროფილი ჸოროფილს : უხვადუდას - უგენდასჷ
ვართი მუ რდას გაძიცალი : ვართჷ შხვას გაძიცანდასჷ
მიჯნურობა ირფელს უმონს,მუჭო ბთქუა აზრი თიში,
ფასაკ გინაჩამალი-რე,ვანჭუ ძალა სიტყვეფიში,
ინა ღორონთიშ საქმე-რე მიმაჩამალ ხიოლიში,
მით გამოსენსჷნი,ვაი,ცოდა უკულ თიში.
მიჯნურ ჯგირი მეჯინელი ბჟაშნერ სქვამი ოკო რდასჷ,
ჭკვერ, ნდიდარი,თანდაბალი,ჩოლამათჷ უღუდასჷ,
ნინა,აზრი,მოთვენა დო გერეშ გერსჷ ორუდასჷ,
ართ ნამთინი თენეფიშე თისჷ ოკო ვარკუდასჷ.
არძოშ უჯგუშ მიჯნური-რე ვარჩქინანს დო ფულუნსჷნი,
ირო თოლშა აწურენ დო ირო თიშო ფიქრენსჷნი,
შორშე ნდღულუ,შორშე ღურუ,მიშაძ ალი დაჩხირსჷნი,
ვაწყინუანს,გალუაფუ,ორიდუ დო უჸორსჷნი.
ჭკვერქ თისჷ მუთ ენდას ,მით მაჸალეს ვენდენსჷნი,
მუ გაგინე კოს ნამუთჷ დუს ოხუ დო შხვათჷსჷნი?
უკულ მუთჷ ასქვამასჷ,დუდშე შეარცხვინანსჷნი,
მუ იჸი კოჩქჯ ხოლოშიანს გური ვალაჭუასჷნი.
მიკვე კოჩი მუს გუმაბუ ჸოროფილი,მიჯნურსჷნი;
მუს აწვალენს მით უჸორსჷნ,მითჷ მუშო შურს ტენსჷნი?
ვაუჸორსუდა მუს გიმაბუ,მუსრე ოშკვიდუანსჷნი?!
უბადო კოს უბადობა, ირო უსხუნ თქუასჷნი.
მიჯნურ ინგარს მიჯნურშენდა,შილებე ვართ გუდღანენი,
ოსქვანს,ხვალე გილარულა ,დუდი გინოდვალირ რენი,
ჸოროფილიშ სახე შუნ დო ირო თოლშა აწურენი,
ვაცხადენსჷ ჸოროფასჷ მუჟამს კათეფს აშარენი.