დიდაშმაჸვილარეფი
სკუალეფი, ვაიჩქუნა სოლე მულ,
დობშულადექ, შური ონდეთ ინმაქანც,
მუთ ქიფხანდი უჩა ფაფალც დოუფულ,
იფაბრკალუქ, სიაფარა ვემშაძ ტანც.
ცაშ დალ პიც ღურუ ურცხას გეჭვიტანც,
ზღვაშ შხილინი ღურუშ ბირას იკაფურ,
მუკალ ალი ეღილატირ მუნაფას,
ახავაი, ცა მინჭყორც ვარ ცა მანგარც.
არიებულ დუდი მაჭუ, ჸვა ტყვაცჷნც,
პიც მილმებდვა წუმოჸინილ ბირცხაშ წვანც,
ბჟა დოუფულ ეციმილი ფურცელემც,
უჩა ღურუ ოლაფარეს გეჸურანც.
ჩქიმ რკიალი გინმადვალუ პლანეტეფც;
სკუალეფი, აკა წუნი გეკურცხით,
კოროცხილო ხვათახვალე აკა წუნც
თოლ დომწკურით თებული დო ბურაცხილც;
ღვაში ზისხირ ბირცხაშ წვანდეფც გაჭვათანც
დო რჩხვიალით დუდშა ხელეფც მითმიმჭანქ
სკუალეფი, სო იჯინეთ... სო ინჭანთ...
თენა მიჭირც ონჯღორეთ თოლც სო განჯანთ;
ბჟა დიდა რექ, თელშო დიასკური რექ,
თუთა, ბაბა, ალობაშო ფურე რექ,
სორე განშე ორო, რუმეს მიკორეთ,
თქვან ონჯღორე, აჰა, ღურას გივორექ,
_ თქუ დიდაქ დო გიცანცალუ პლანეტეფქ:
_ ვავა, დიდას მუში სკუა ღალატენც,
ვავა, დიდას, მუში კათა ღალატენც,
ვავა, დიდას, შურცუ მურე ალატენც.
დიდაშ ცოდაქ ქაგინაფუ როკ ტანჯას,
ივარ ხომლა ფურცელქ ხოლო დიბურიცხ...
ბჟა მურიცხიქ რჩქინელქ დიდაშ სითინჯათ
შარა ვარე, ათე დიხა ვაპანჯას.