დონ კიხოტიში აგაგა
ჩელაში უღუ გილამიღუ
ჭურია დო ნაბადას,
დიბშირი დო ქუვაგური
დონ კიხოტიშ აგაგას.
თუდო რზენიშ ფართანას
მობწყინდი დო აკა დღას
იმენდეფიშ იმენდით
გეკვაკითხე ლაკადას.
გილურქუ დო ხვათახვალე
გილვობარდა ლებარდეს,
მა დო ჩქიმი ჭკოლა ცხენც
ონჯუაშა ვემმართეს.
თავრე ხოლო მითინ ვარე
ულირ ბორჯიშ გინაფას
დო ვოცადუქ კირიბიში
შურიშ გოკურცხინაფას.
ითამ, ქიდიბურძღინუო,
მასქური ქექას ირქენცჷნი,
ვამიჩქ, თუთა დო მურიცხი
მუშენ გიმაძიცენცჷნი.
ჟი, გვალაშე მუკნახარცქა,
შხუმინ ორე წყარეფიში
დო ვარ ნგარა ელმასჷმე
ულირ ანთას წანეფიში.
უჩა დღაში ჩილამური
შურშა ნარღო ენომწენც
დო უშარე შარეფით
გილუნთირუქ ჭკოლა ცხენც.
„დულსინეა“ სო მაგორე,
ჩე დო უჩათ გორთილ შურც,
„სანჩოქ“ ხოლო ჩქიმ საჸალე.
შორშე ქიმიობორდიშუ...
დაჸვერებე მარგალონა,
დაჸუნგებე მარგალური,
მა, თე ცა დო დიხაშქას,
ჟირშა დებაბდი დო ბღური.
მენდი შურშა ენომიხე,
მუჭოთ თოლი მარწკინდიში,
გონირზჷქდა, რჩქინა მოკო
დომფული დო ვამწინ თიში.
ქარ–ბორია ვაიჩქუდა,
შარას გილემანგარუნი,
მა ვორექ დონ კიხოტი,
ჩქინობურა, მარგალური.
მეურქუ დო ირ დიხაშე
ეკმოძიცუ გვალა–რზენქ,
მუშ მოხოლეთ ვამიჩინ
ჩხოროწყუ და ნარაზენქ...
დო სი ხოლო საწმოხონოთ
მუთუნ მენდის ვამარზენქ,
მუ გოწყინეთ თეშ მანწარა
მა დო ჩქიმი ჭკოლა ცხენქ.
დიო სქანი მოსაწონი,
ვამკებუნა ხეს მუთუნი,
ღორონთი თოლეფც გომინჯანს,
ჩე გვალაშა გეშურქუნი.
თეიშა მუთუნ ვამიწუა –
საჸალე დო უმარდული,
ვაფირქენდა, მარსხებელო,
გუბაზ მაფა დუგართუნი.
ინა ხობის დუჸვილჷნა,
ისტორია რაგადანც,
დო მა ასე ეკოპუნქ
დონ კიხოტიშ აგაგას.