დოსერე დო უკმელას
დოსერე დო უკმელას
თოლეფ აკუწკურუაფ,
წკურემ ქუდოჸონენ დო
გური აკუწუხუაფ.
გოთანე დო ოჭმარეს
კვარჩხი აკუსხუნუაფ,
მაჭირხოლეფ ოხვამეს
ართათ აკუფურნუაფ.
ქერეთ ონდღეს ცაშ იშო
ონჭაფეშა უნჭუაფ,
ჩხანას გუბარჩხალუ დო
ნდოლოს ცუნდი ქუდურღვაფ.
სერ უკმელას ელათხოზ
ოჭმარე მუშ გოთანას,
ონდღე დღასი გაწირღოლ,
ჩხანა ცას გაბარჩხალანს.
გაკვარკვანტნა ართიანს,
მელე-მოლე, ძგა დო ძგას,
ლეტა-ლეტა, ტყა დო ტყას,
გვალა-გვალას, ღალ დო ღალს.
ღორონთ, მუში ხიოლი
სი არძაშა ქიმეიჩამ,
არძას ნოღვე საშველი,
ვარა თეში, ვარა – თაშ.
ჩქიმი სო რე, სო იტყობ,
ნამუ შარას გილეგაგ,
სო ელარე, სო იშოლ,
ნამ ოლაგეს გილენგარს.
ქუმოჭარე ჩქიმ ხიოლი,
ჩქიმ საშველიშ ჭირნაფა.
ბედინერ დღას ციორი,
ჩხანაშ აკოძირაფა.
დოსერე დო უკმელას
სერშა ქეწუსერუაფ.
გოთანასი ოჭმარე
გურშა ქუხუტოლუაფ.
ღორონთ, სკანი ჭყოლოფათ
უმკუღალუს მუკუღალ.