დუდი ოჸვილარი მაფუ
1.
დუდი ოჸვილარი მაფუ, საქმექ თეში გინიმართუ,
მარა სინდისის ვუჯინექ, დიო უჩათ ვა მიღაფუ.
ვორწყექი ნი -- ვიჭუუქუ, ვარდა გური მიღურუ,
თინა მეგულებუ ნჷ -- ექი ოში ვერსის კუჩხით ვულუ.
ასე ლეხი მა ბჯანუქ, თიშ ჸოროფათ განაჭირი;
თე ჭუაშე მირსხენდუ ნი, ფერჸ მითინი მა ვა ბძირი,
თე დღა თაში მობძუდუ და, დღაშახჷ მუშენ ვა დოპილი?
გინდა პილი, გინდ მაცოცხლი, გინდა წყარცჷ მოშქვიდეე,
ფერჸ წამალი დომიგორი, თე ჭუაშე დოფსქიდეე.
2.
მუ ფქიმინა ბედი ჭვილქუ!
ირო ართო მა სი ფშუქუ.
ბრელიშახი მიიმდომი
სქანი აშაჭყოლიდაფა,
მარა მუთუნქ ვა გომირთუ,
დუც ვოძირი ტყურათ ჯაფა.
აწი შვიდობითი, ბატა,
სი ჩქიმ იმედითი ვა რდა:
სქანი დო ჩქიმი ჸოროფას
გუულირი აფუ ვადა.
3.
ადამიან კოჩიშ სქუას ნატრი მუთუნს ვჸახვარუნო?
ნატრიქ კოცჷ გეურთუ ნი, მუთუნ წინგის ვა ჭარუნო?
ეგებ მითინ ქრისტიანეს თეცალ წინგი გობარუნო,
ქუმოთხიი, შემწეობა გაჭირვებულს ვჸახვარუნო?
ფერი სნეულება მოჭუ, ჩქიმი სქილადა ვე შილებე,
წამალი მუთუნც ვა მოხვარუ, ექიმც დუდი დავანებე:
ცოცხალ ვორდე, მუშოთ მოკო წვალებაში თუდო რინა?
ნატრით ვიშერებუქჷ დო ვე ეპოპტინე, მუ ფქიმინა?
ეჰე, ჩიტი, ქოფურინი, ქემეუღი თენა თის,
ენა ხეს ქიმეჩი დო ართი ქააჯუდი პიც!
ანფერ სქანი ჩიტობას, მუს მომიღა დუნართის!
მუთუნ ქაარაგადაფე ეთი ჩქიმოთ დინაფილს!
4.
ვარა ნანი, ვარა ნანი, ვარა ჭიფე, ვარა ბანი,
ჭიფე ფთქვი ნი, ბანი ვა რე, ბანი ფთქვი ნი, სქვამი ვა რე.
--
სქანჸ ჸოროფა მა ბჭუნს, თეში კვესი ვა ჭუნცჷ ობედის,
ჩქიმი გური თეშ მუკობუ, მუჭოთი ჩხომი ანკესის.
თანდაბალოთ გოხვეწუქუ, ნუ დომიჭუ მა ბედისჷ.
ჩქიმჸ ჩილამური ვა აქოსე სწორეთ დიდი სალფეთქისჷ.
5.
ჸოროფას ვონდურუქ, გული ალაჭვილი მაფუ.
უბედური ჩქიმი დუდი, ვაი, მუსუ მოსხუპაფუ!
ღურა-დღაშა ვიტანჯეე, ფერი საქმე დომიჭყაფუ,
მოღალატე ჸოროფაქჷ გური სევდით დომიღაფუ.
6.
სი დოზოჯი, მა გალინა, სტოლს ვა გჷგონწყუაფუა;
გონებუ ნდა, დოზოჯი დო, ვარდა გოგულებაფუა.
მიიღი, ბატია, ჩქიმი თხოვნა, ამისრული გურიში ნდომა!
ტყურათ ვე მემიდინუა ჩქიმი ხანდება დო შრომა.
სახე ანგელოზიშ გიღუ, სირმაში გეგორწყვათუ თომა.
7.
ვაი, ღორონთი, მუ შერცოდი, მუს გიჭირსჷ ჩქიმი რინა?
წარეთ შურსუ პკაშუნქუ დო გოჯოგელი მაფუ რინა.
8.
ჸოროფა ნწარე, დღას ვე შმანგარე,
ცაშა მეურცჷ შური მეუბარე!
ვა, ჸოროფა, ნიჭი სრული, წამს ტკბილი დო