ეკოპუნქ ჯუმწყარს
ეკოპუნქ ჯუმწყარს დო გვერიშ ხვითოცალო
ქუალეფს მინოტებულ ჩქიმ ბაღანობას გილამნაკვერანქ,
ეფშას სიწკონდათ, უნარღელობათ...
კადრეფო ადგუმუ შური
არძო თი დუდით სხაპუას ვით მეტრიან ჯაშე,
ართიანშა დუდიშ ნწყუაფას დო
თელ დღას წყარს ალახუნაშე,
წყართუდო თოლგონჯამაშე აზისხირაფილ თოლეფს
დო უკულ თეს მოჸუნელ ნანაშ ჰამო ხეს,
ღვანწკეფს ჭკადაფილს...
ქუალეფ თაქ რე, ჯალეფით თაქ რენა,
დიხა ხომ თაქ რე იშენით,
მარა ბგორი დო მუზმა ვა ბგორინ,
სოთინ ვა მაძირჷ თი წყარქ არწორო,
ნამუსუთ მუთმოხვადუდჷ თენა ირფელინ...
მის უჩქ, ვანე ზუღას ქაკათჷ დო უკულ
მუნაფათ ეხვამილაფირქ, ჭვემათ გიმულირქ,
ინილ შხვა წყარშა
დო ასე თექ რდუნს ბაღანეფს ლაზიშ,
სარფის დო ხოფას, არქაბის, ვიწეს,
არტაშენს, ბორჩხას...
გილეკიონტას ეშე დო გიმე,
წყარმალშე წყარმალ გიმითირუას,
აკილას ირ განი თელ დიადიხას,
მორდას ბაღანეფ, ნტერიშ დო კერზიშ,
უმკუჯინუო კანიშ დო ფერიშ,
ირდან დო ირდან...