ექსპედიციონერი
ხაბაკეფი დო ორზოლით
დობარგელე მეცნიერი
მეურც დინჯი ნაბიჯეფით,
ორე თინა დიდი ჭკვერი.
ირფელი თის ოინტერეს,
ირფელც თინა გაკიკინანც,
უგუჯინუო ვემკიტენც,
მუდგა ჭიჭე საკითხი რდას.
გორჷნც ახალი ქიანას,
მეურც, მეურც დო იჯინე.
ონოტყერენც თინა ილენც
დო რობუენც ინაჯინე.
გვალას მეურს, შიშის ორწყე,
უშარე დიხას მიკოჸუნცუ,
ოძირაფუ აკვირენცჷ
დო თის გინართუანც შურცჷ.
გორჷნც, გორჷნც, ოშინერცჷ
მუთუნ ნადინეფი ცალო,
ასე რენი თექი თანდჷ,
ტყასჷ მითოსქჷდჷ ძალო.
თინა თაში მუშენი რე,
თესხის მიშო ხანდილენც,
ვარა მუში ნახანდილას
ბოლოს მისჷ აზარენც?
თინა ირკოჩიშო მუშენც,
გორჷნც უცხო ქიანენც,
გურაფულენც ახალენც
დო თით რინას ახარენც.
ერჩქვანაფუ, უჩინებუ
აფუ ოლჷ თის შარეფი
დო თენერი შარობუას
ოკო ბრელშა წანეფი.