ვარდის ლეტას გაბუნა
კვარჩხშე მეურს ჩქინი რინა
ვარდის ლეტას გაბუნა,
ცაშ ჟინ გიბჭყოლიდეთჷ დო,
ორქო ღორონთი მაფუნა.
სამართალიშ მაგორუ
სარხოს მითინ ვაპუნა,
კათაშ სარგო უნჩაშეფს
ზიტყვა ვეკოლაფუნა,
პარლამენტის დუდალენს
ოთხ ჸვერე დო ართ ქულა,
პარტიეფიშ მანჯღვერეფი
ართიანს იკოლახუნა.
ონარტებელ გინუშქვეს
კათას ღუმ დო ჩაფულა,
ირ ნაბიჯის მათხირეფი
ქუჩას მიწოტაკუნა.
მაჭარალეფს, პოეტეფს
კალამი გეწოლაფუნა,
კუჭ-ხუმაფილ მენცარეფი
ბაზარს სერეფს ტახუნა,
ჩქინ ოსურეფჲ თურქეთის
ჭიპ-ტარკალეთ სხაპუნა,
დოლარშა დუს გიმიჩანს
ვითოშ ნანი დო ხათუნა.
ჩქინ წილ ცოდა ხურჯინით
ხუჯის გჷლჷმოპახუნა, -
ჯიმაქ ჯიმა გიმოჩუნი
საშველ თიშენ ვამღუნა.
ჩქინ თაობა წიკვილი რე
მუთუნ ვამოხვარუნა, -
ზისხირამ ხეშ ორჩხალო
ზღვაშ წყარ ვამობაღუნა.
ღორონთი გიბჭყოლიდეთუნი,
ცა გონჭყორელ მაფუნა.
კვარჩხშე მეურს თე ცხოვრება
ვარდის ლეტას გაბუნა.