ვაურჩქილათ გამახარიას
ვაურჩქილათ გამახარიას
პრაფესორ მუს რაგადანს,
ეთიცალი რაგადიშე,
დო-დირგეს ბაბუ-შარას.
"ნარეჩიეს" იჩიებუ,
"ლ" ხოლო უღუ მანგარას,
"ლ"-ს ლომეფი თქუანა დო
ვართ თეცალი მანგარალი.
"ჩელა", "ჩონგურ" ჯგირ რე მარა,
ჯვეშებქ დომტის ნაბირათი.
ასე ჩქინდე ხოლო ელნა,
ახალს მუს მივობირანთი.
ლაშას ლერსფს ქოუწინთი,
კუპრაში გურიშ ნანგარას.
კაზიმიშ "დიდოუ ნანას".
თურქეთისი ნაბირას.
თინეფს ხოლო მოკითხენა
მიდგა განშე რაქვალანს.
გეუოლნა ალბეთ ბურდღინ
"გუჯეჯიანიშ" ნაზაკვას.
კოლხურ ნინაქ ვემედინას.
გური თეშე კანკალანს,
ლაშას ოკო ურჩქილათ დო
არძაქ ჯგირო დეფიფქრათ:
"უმინჯ ჸვანა -ჩქონაფილქ თქუ.
სარდაკიაქ დაჟღირუა,
ქემინჯი-თ დო გაქშაბურცხე-თ
უმოღე დო ნაჟირუა."
"სარდაკიეფ" ქართის ძირნა,
"ოჭყორდუნა" მარგალური,
მენცარობას იჩემენა,
სერით ვაუღუნა რული.
"დიალექტი" ჸოფე თურმე,
მედეაში კოლხურ ნინა,
ჯვეშბს მუჭო შეხვადუნა,
სო ულამნა ირო რინა!
ვამოკოდუ თე ამბეში,
თელ ქიანას გობჟინაფა.
რუხიშ ჯიხა მირგანჯუანს
ვემილებე დორულაფა!
მუშ ჯინჯ ნინა ვაუჸორსუ
ქორთუობას ვაინალუ,
მარგალ-ქორთუ მუქუ გორთუ
ვარა შონ-ლაზ ართო მალუ.
არქა ბოშეფ, ვადოშქურდათ,
გეგნოსქიდუ მარგალური.
ლაკადეშე ონდო ვალუნს,
ელიავაში დაჩხირ გური!
დღას ვამჭარუ მა ლერსეფი,
ვართ მარგალურ-ვართ ქორთული
მარა კოჩის გამწარენა,
თინკმა ჸოფე უბედური.
ნინაშ მარდი მიდგას უჩქუ
შონურიში, ქორთულიში,
თის მარგალურ ხოლო უოჸორს,
რჩქინა ოკო ლაზურიში.
ჩქინ სისკვამე - ქორთუობა
ათე ნინებს მიშახვილუ.
არძა მიჩქდან თიშ მანგიორ,
ურჩქინ ხალხიქ ქიმკმახვილუ.
თინეფიში გასაგონო,
ქოფთქუანქი ბრელშა ხოლო.
მენდის იპტენქ გეშაკურცხნა,
საქორთუოშ სასახელოთ!
19 თებერვალი 2011წ.