ვო ღორონთი
- ვო ღორონთი!
- მუშა რე ასე კინ საქვარი?
- რთხინქ, ქიმმეხვარი, ჩქიმ დუდიშ რეალიზაციაშ ამბეს.
- სი უკვე რეალიზაფირ რექ.
- ჰაჰ, გიმაძიცანქ ვარო?!
- მუშენ გიგაძიცანქ, რენო მითინ თე ქიანას მით რჯოგუნ?
- ვარ, მითინ ვა რე ეცალ.
- ირკოჩ ხომ ქოგიჸორს?
- ქო, ირკოჩ მიჸორს. გვალო ირკოჩ მიჸორსიან, ტყურა, მარა ვართ ჯოგინს ვოხვილუქ მითინიშის, შურო ვავარზენქ თოჸუჯის თე ღიაბის.
- მიდგაქ გოწყინებაფუნ, ირკოც ქაპატიო ირფელ?
- ქო, დიადიხას ვეგლურს მითინ, მიშათ ვამიპატიებჷ, მუთ ჩქიმდა უწყინებაფუაფუნ.
- მიდგაშა დაიშებუნ, პატიება ქოთხიო ირკოც?
- ქო, ირკოც მორდება დო ბოდიშ ვუწი, ირკოც პატიება ფთხი, კოჩიშ სქუა ვარე ასე მითინ, მინიმუმ ფეისბუქით ვარა ვამითხუ პატიებან.
- შხვაშა გიწოლუაფაშ კორინქ ხომ მეიდინ ბოლოშა?
- მუზმა ხანი რე. ასე ხოლო კლიენტეფშა მაფ ოინალუს ორეკალინ, წორომოხანდეეფს ოკო ევოსქირუე საკიბირო დო ვით ლარ გინაძინა მა ეფჭოფე ოკო წიაკალო ირ თენერ მიდაღალირ კლიენტიშე, მარა ვამოკო, ვა ბრეკუნქ, გურ მორუ, ქაწიბრინუა თოლშა მუჭო პიჯიშე მილმუჸოთანქ თინეფს ლუკასინ.
- ოო, ეშ შურო ვაიცადებუნიან, ტყურა ხომ? დორეკი ხომ მუზმა რენ კლიენტიშა? მაილ ხოლო ქაჯღონი მუდგაზჷმა რენ ფირმაშა, თაშ ვარენო? სი ვარდუო მიდგარენ ბოშეფს, თოლწოხოლე, არგამას ეთმიოსოფანდი ართ კლიენტისინ დო თინერ გიღაჭალუეს, ნინაქ ვეგკაღინ უკულინ?
- ქო, თაშ რე, ტყურა მუშო მოკო. ვარდა სი მის აღორებექ ღორონთი. მარა ენა თიშენ ფქიმინი, გვალო ბოროთ ვემემრჩქინესკონ. გამაღეთ, ართ ზიტყვათ ფთქუათინ.
- პოეტი კოჩიქ, თენერ უშურგურე სამუშას მუჭო მიარჩქვანი?
- დიო ართი, ჩქიმ პოეტობაშ მუ ფთქუა დო უკულ მაჟია, პიჯიქილე, თაქ ვორწყექ ამბეეფსინ, თენეფქ ირფელქ ლერსიშ გვალო ჯგირ თემათ შილებე გინირთასინ.
- იშენ მუს ორწყექ თეფერს?
- ვორწყექ, მუჭო მიოცადჷ ირ კოჩი, გინოსქიდასინ, მუჭო დაღორას მაჟია, მუქ მოგება ქოძირასინ დო თენა ირფელ, მინ პიარიშ, მინ დიპლომატიაშ ჯოხოშ თუდო თინერ აკოქუნილი რე, შურო ლამოს ხოლო ვაწუხენს მითინს. ფირქენა, თენა რენია ჩქინ სამუშა დო შურო ვანარღენა, მუნეფიშ ართ ქიმინუაქ, შილებე ართ ფირმა გვალო გოღილონტასინ, თი ფირმა, სოდეთ მიარე კათა მუშენსინ.
- ინგარქ დო ვარ, გაჭირებულ კათას ორწყექინ, გურ გეჩქიჩქარებუნო ირ აჭიროთაფილ კათაშენ?
- ქო, გურ მიღურუ კათას მუთუნ ვაპალუნ დო დუდიშ გითაჭოფაფალ ვაუღუნ, ვორწყექინ. თინეფი არძა მა ვორდენ, თეშ მიმოჩქ.
- ხვალე მეურქ შარასინ, მიარე კათას ორწყექინ, მუს ფირქენქ, მუს გინაფულენქ?
- შოშეს მევურქინ, ირკოც მეფხვამანქ, ირკოც ჸოროფას დო წიმიულას ვუზალანქ დო თოლეფ მიხვიჩონდუ ბედინერობაშ გეშა, მუშენ-და, თეშ მიმოჩქ თიმწკუმა, ითამ თენეფს ჩქიმ ხვამათ არძას ხიოლქ დო ბედინერობაქ დასურო გემნაკათ გურშან.
- ოჭმარეს მუჭო იჭყანქ?
- ოჭმარეს დიო თინეფიშ ხვამათ იბჭყანქ, მიდგა ოკო ვამიჸორდას ოკო წესითინ, მიდგა ოკო ბჯოგუდასინ. არძოს თენეფს გეგმოფხვამანქ დო ჸოროფას ქიმუჩინანქინ უკულ, მიკმუვართუქ ჩქიმ ოჸოროფულ კათას დო სით ქოგუჩანქ გურს, ენეფს შურო მუნერო ფხვამანქ უკულინ.
- წაულირ ფირქეფ გირჩქინდუ დო ვარ, სქვამ ცირეფს ორწყექინ?
- ოჰ, სო მიკმოხვილი სი ხოლო ასე. ტყურა იჸი ფთქუენ, გურ ვამაკვარჩხუნიან, მარა წინდამ ფირქეფს, იშენ, მუჭოთ გვერსინ თეშ, ეთმუვოღა დუდს, არძას ჸოროფათ მიკმუვოჯინექ, შხვანერო ვართ შემლებჷ თინეფშე ფირქი.
- მუს ორთუქ თიმწკუმა, მუჟამც კათა თეშ მოირე, ითამ გაღორენა დო სი თეს ვახვადუდე, ფირქენან?
- მოცოდ თენერ კათა, მარა მა ხოლო ვეგმიფხუნუანქ, მა ხოლო თეშ გიბრინუა ანგარიას, ითამ ქო, დასურო ბორო ვორექ დო მუთუნშა ვაგომჩამ გურინ.
- უკულ მუ მოიღ თექ ირფელქ?
- გურჭუა დო გეძიცა, მარა გურიშ ტომბას მიჩქ, თინეფ, არძა მა ვორექ კინ, არძა ართ ვორეთ, ართ შურს შხვადოშხვა ასა-გასა გინმოქუნა ხვალე დო თენა რე. თაშ ნამდა, მა მუთუნით ვა ვუჯგუქ თინეფს.
- მუ მერჩ ეკონია ვით წანიან ჯოჯოხეთურ ტანჯუაქ დო ნგარაქ, მა გიჯღონანდი ირიათო, უმუსოფუონ?
- დუდი ქუმოჩინებაფუ. დიადიახა დო ჟინ ორთა, ედომშამ კოჩიშობა ქუმოჸოროფაფუ. მა ედომშამო ჸოროფათ გინიბრთი.
- იმწკუმა, სი რექო თინა, ათაქ კიდირს ინმაგვაგვუნ?
- ქო ღორონთი, მა სქან გურ ვორექ. ჩქი ვორეთ ირფელ...
- დუდიშ რეალიზაცია...
გედი სქუა, გოკურცხი, გეგვიანებ სამუშაშა...