ზანური ნანაია
ჰოუ, ნანა, ჰანანი,
ნანაია, დირულე,
მინორთელჷ რე ქიანანი,
ლურც მუშენი ხირულე,
ნოჸორჷ მოუქიქანანი,
მუ რე დიდას კვირულე?
ჰოუ, ნანა, ჰანანი,
ნანაია, დირულე!
ოჩოკოჩი თირხონით,
ტყალეფიშე მირულე,
წყარიშჷ დიდა ქიფხოლით,
ჩქიმი თოლი გვირულე,
სისმარეფი ქიფხონით,
სანთელეფცუ რწირულე,
ჰოუ, ნანა, ჰანანი,
ნანაია, დირულე!
მუსხი ზისხირქ ქჷდოწუ,
კოჩჷ ბედეკოჭვილჷ ჸურე,
ჩხონჩხამეფქჷ ქჷდოცუ,
ქიანას მი რე მილურე,
მუმა დიხას მითოძუ,
იშჷ აკანსუ ხვილუ რე,
ჰოუ, ნანა, ჰანანი,
ნანაია, დირულე!
მიმოტუეს ნათესეფქ
დო ხვალახე ბრკინულე,
გიწარწჷ, ვარა ვაგიჭიშჷ,
მუმაშჷ ლეკურჷ რგილუ რე,
მორდე ოკო ტახილჷ ჯიშჷ,
ღულა კათას გინულე,
ჰოუ, ნანა, ჰანანი,
ნანაია, დირულე!
მუჭო ენმოყვიყვინანქჷ,
მუჭო ირფელს რჩქილურე,
დიო ტანით მიგინანქჷ,
დიო ტანით ბჩინულე,
მუჭო მითიქვიქვინანქჷ,
წყარიშორო ძინულე,
ჰოუ, ნანა, ჰანანი,
ნანაია, დირულე!
სქანი ჭუტა ქარმატე,
ჭიჭე სქანჷ წისქვილარა,
ართო გურშა ქალმანტე _
ბედიშჷ ნაკვისკილარა.
გვიმარა დო ლიმხონა,
ცირეფი დო კულანა,
ბამბეცალი ნირსეფი
ცაშა გეშაქულანა.
აფხაზა დო მარგალი,
ქორთუო დო ლაზონა,
მურიცხეფით გაძგვატუ
ლური ნადარბაზონა.
ნანაია, დირულე,
ჰოუ, ნანა, ჰანანი,
ჭუმენი ბჟა ბარჩხალა
თოლსჷ გითომღანანი.