ზღვაშჷ წილოხუა
...სარკო უგუთებუ სერს
უძირაფუქ გჷმაძირ დო ვაგუაცხადენ გეგნობწკანტჷ,
შურსჷ ნძორი მეუტებ დო მარდიანეფს ქოკათაფუ
დო ორწყედუ ურსკვითეფი მუჭო წჷლოხუნდეს ზღვასჷ.
გოსარანჯელჷ ტორონჯეფი გილეხურთქინუდეს ცასჷ
დო გონირსილ ოგვერესჷ ხვითო მჷშარკიანდ შკასჷ,
დო მეხიში ეკნაპანჯა ჯამპის ცირუშჲ ნაფაცასჷ.
მურიცხეფიშჲ გჷნახუნა კვერცხეფს ბორჯიშჲ გჷთნახასჷ,
საღორონთო ზისხირით დო ჩილამურით ნათანჯასჷ...
დო ოჭახჷს ურწკინუო საფულერი ღურელეფი
შურს უმბარდეს ჩხე მაჭარსჷ;
დო ოჩოკოჩჷ ურგინჯუანდ ეტახილი ტყაშმაფასჷ...
დემიშ ჭემშა გჷთნაბეჭა გურგინი გერსხჷდ მაზაკვალსჷ
დო ზისნახე აგაგეფი გაროჸანდეს დაჩხჷრს ტყასჷ...
შურჲწჷრდეში კიდირცალო ივარვალჷდ დღასანწალჷ
დიდა სქუასჷ განგარდჷ დო გერეფი მიოჸურანდესჷ
უჩათ გჷნორუმელ ბჟასჷ.