თაქ დო უკულ სოთინ ვარ
ათაქ დო უკულ სოთინ ვარ.
რჩქინას არძა ზა აბორჯებულ აფჷ.
მოჩიტოლირ ბაღანეფი გილარენა
შოშეს დო წანეფც იჭყოლიდუანა.
თაურენ დო თეურენიშ გინართუს,
ირ კათა უჩინებჷ რე.
გოღა, ნოღაშა გიშულირქ, ჩქიმ ფიჟვეფც
ინოკასილ კუმას,
დახე თელ ასა-გასა იშო ქოვუჸუნე.
ნოღა ხოლო მუნაფაშორო იგვალისუდჷ
დო ბართვიშორო აკოკვარკვალერი
ჩქიმ ჩხოროშა მოძირაფილ რინაშ ოჭიშის
გიკერკელუდჷ.
მა იფრთუდი ნოღაშე,
სკაშ ბუკეფშორო ართიანს რანწკას მეწკიზილი
ჸუდეეფც მეპკოროცხუნდი.
ჸუდე ირფელც ოკო,
ხვალახე მუწორინა ჯას ხოლო
ვამაძირე, კოც ვარ.
ინა ფურცელეფც ვარა ქოუშქიორუანც,
კოჩქ მუ ოკო ქიმინას?
იჩიასუნ, იშ შარაქ ოკო მიკორჩქინდას დიო,
ხვალე გამკაჭოფუ დუდი-და, ხვალახობა ვეიოჩირთჷ.
ათეშენი, დიო ზა ოკო გარჩქინას დო თის ქიგიაჸუნას ოკო.
ინა ვაძირეს-და, ზას იშენით ქოძირუნა.
რჩქინა ხვალახე რე ირო.
დიო სქან რსხული, შური დო ჸუდე ხოლო ოკო
ქოიძირანი,
უკულ ჯგირო ქინგოჯინენა, ბრელ კათა ქუგოცქვანს-და,
უკულ ქუმოირჩქილუანა,
სქან შარას ქიმიგორუანა.
ეიშა მუ თქვინ ის, მითა გიშაისხუნუნს,
ოწონდეს მიკოჭარუდას ოკო სქან გვარი,
ვარა ასა-გასა ცაშორტყაფცალო ოკო
ითირანდას ფერეფც.
ენას ვახვილჷ ჯა.
ფურცელეფც უშქიორუანც
დო უშქიორუანც.
ბორიას თინა მოძირანა.
მოშქურუდუნ ის ქომივარჩქვანი.
მანგარო რშულიდუნც ადამიერც ათე უმოღე ადამიერეფი,
მუნეფიშ ურჩქენჯალას რჩქინათ
ეთმიორზანან ჩაჩამუტა ან დო განც.
ცარგვალო მირჩქინანა დუც დო ტყურაია მურიცხი ხოლო
ენტებულ აფუნა.
შურუქალუო გაჩენდანინ ეს სიტომბა ოკო, სიტომბა.
სიტომბა ხოლო, ჭიე-ჭიეთ მუგაძინუ, ვარ-და,
უბენარო გაღვენუდჷ ირო,
ევრე ვამოჸუნდეს, აქ ვემიძინეს,
ათეშენ ბორიას ბოწოწცალო გილუღჷ თეშნერ კათა.
ათაქ გინგატებუ დუდიქ-და, თენა რე გომორძგუა.
ათაქ დო უკულ სოთინ ვარ...