თუთარჩელა'
ზღვაშ-ფერ ცაშგურს ლურმორებულ
თუთა თოლეფს უმანუანს,
ტყას ხოლო ლურ გოტახუნ დო
სერს ჩქიმწკიმა ოთანუანს.
დოშურდუდა, თუთა ლებო
ჩე მუნაფას ქაგთიფინანს,
ლანტით რულქ თოლჲ გაქთუღჷ-და
მარწკინია გაგმოთირანს.
ტყაშმაფა ღალს ამბეს არჩენს,
მუსუთ გვალა მაჩინანსჷნ,
ცხაცხუშ წვანდშე ჩიტ სერს ორკინ,
შარა ვარე, ვარჯგინასჷნ?!
განჩი მუთუნ ვაგნიჩინე
ოკალმახეშ სიორიშა, -
ოჭაკეშ ტყაშ არიკ მოუღჷ
ემხვარეფიშ ნოხორიშა.
ოქუმ-წყარ ლურს ბორდიშანს დო
სათანჯოს ჟი მურიცხ ჭვიტანს,
ბებიშ ნაჭვა ჭვიშტარჯგუა
თუთა ცაშ ჸვას მიკოცვინთანს!