თუთაშობა
ათე გვალას, ათე ცას, ათე სერს
გუართუქ მართუშორო თუთაია,
არძა ხანგას, არძა ბოროს, არძო ჭკვერს
მივოჯინექ მასკილადო თუთუბია...
ღორონთ ვორდი სანთელეფიშ ომინჯური,
მუკმოქუნდუ ვარჩხილიში კაბა–სერი,
გილვოცაცანდჲ აცა–ბაცა ცაშ კირდესი,
მიღირთანდუ შურმორთელი ტყაშფერჲ გერი...
ჭველა ვორდი, ჯვეშიშ ნჯარით დალებური,
ჸოროფილიშ გურჭუაში მარჩქილარი,
მოტიბუანდ მურიცხეფიშ რგილ ყებური –
მუნაფაშ დო გურგინეფიშ მაჸვილარი...
თუთა ვორდი, თუთაია თქუთქუბელი,
გუმორთანდეს ჩხორიეფი არიკეფსი,
ჩე გვალაშე მუკნახარცქა ლეგენდეფი
დინაფილეფს პელაზგეფქი მირიგესი...
ვორწყექ ირფელს – უძირაფ დო უთოლეს,
ურქენს მასქურჲ ჩქიმი შურით ქიანას,
ვოტიბუანქ გოძიცელო კვიკვილ სერს,
გუთმოპინუ გურმულირო იანარს...
მა ცაში დო დიხაშ ჸვაშე მუკობტყვაცი,
ჩქიმი ნინა – ღორონთეფიშ ოცქვაფური,
მოკოდ ქრისტეს ვახოლიკო ოკოჩესი,
მარა წვებერს თუთაშფერო ქონკობღური...
მიქ ჭარ ბჟაშ დო ჩქიმ ჸოროფაშ არიკეფი,
ჩქიმ ცოდეფიშ მახანტალო მერჩქინელქი?
დუდ ღორონთო მომღუდუ დო სერეფიში
ხვათა–ხვალე მაჯინალო გეფრჩქინექი...
ათე გვალას, ათე ცას, ათე სერს,
გუართუქი კილოთით დო ბურბულით,
გვალო მალას ჩქიმ შულადირ ჸოროფას –
გუათენქუ – სერ დო დღაშიშ ჭურჭულით!..