ინგლისიშ ნოტყეფქ (ორინჯეფიშ ფერმა)
ინგლისიშ დო ირლანდიაშ ნოტყეფქ,
ნოტყეფქ არძა კუნთხუში დო განიშ,
ოხიოლე ამბე ქიმირჩქილეთ
ჩქინი ორქო-წუწელ მუმალ ხანიშ.
ამდღა ვარა ჭუმან ქუმურს თი დღა,
ტირან კოჩის ქაშვოფორჩანთ თუდო
დო ინგლისიშ შხოშხორია დიხა
ჩაფულათ დო ცა – მიფრჩქინათ ქუდო.
გამიფსოფუნთ კაღუს ჩხვინდშე არძა,
ოჭიშიშე გეგნიპოთანთ უღუს,
დეღანჯებუ მოხამუზ დო ლაგამ,
ანწ მართახ დღას ვემკანჭუ ჩქინ პუხუს!
ევიფშაფუთ, ჩქინ იჸუაფ ირფელ:
ქერ, ქობალიშ კაკალ, რჩვია, თიფუ,
ტყაში ბამბე, ლებია დო ხოლო
სოტოლია, – მუზმას გოკონ რთიფუ!
გასინთორენს ბჟა ინგლისიშ ვეეფს,
დიწკონდინუ თიშ წყარი დო ღალუ,
მასქურ ხოლო დუმბარს უმოს ჰამას,
დუდ უღუშე მუჟამც გეგთიღალუ.
ეთი დღაშო იპჭვამაკათ არძაქ,
შურქ თეიშა გეშმოლანი ხოლო,
ჩხოუქ, ცხენქ დო ღორღონჯ, კოკუჩიქით –
დუდშულობა ქობძირათინ თოლო.
ინგლისიშ დო ირლანდიაშ ნოტყეფქ,
ნოტყეფქ არძა კუნთხუში დო განიშ,
თქვათ ქირჩქილით, ქანას მოდვით ამბე,
ორქოთ გოჸილ თე ჩქინ მუმალ შვანიშ!