ისირი
გუმაშინე ჯვეში ბორჯი,
ჩქიმი ჸუდე ისირიში,
ასე ხოლო თაქი ვორდი,
ფირქით კინე აშო მიბში.
ავრე ჰავა იქაქალუ
ჩქიმი ხანგა ინგირიში,
მინდორც ისირ იქვაქვალუ
გინასერეფ კიდირიში.
ჩქიმ ისირი, სკანდა იბდი,
მოშკურ სისმარქ ვერთასია...
ისირიშ ღერ დუდშა მიდვი,
საბედოქ ვეგენტასია.
დობშაყარე თე ისირი
დო დანჯირუ ჩქიმი დობრთვი,
თიმწკუმა რდუ, სი ქორძირი
გუმოჭყორდუ მუშა მობრთი.
ჩქიმ ისირი, ისირია,
სისმარო კინ ქორძირია.