კოლხებურ ჸოროფა
ბოშ:–
ჸუდეს ვოხექ იბჯინექ,
მუ ბქიმინე ვამიჩქ,
დღაშ დო სერით ართის ფირფქენქ,
ქუოფურნუანქ მემიჩქ!
ძღაბ:
– მუ რე წიე მუქ გაღოლ,
მა მოირსხე ეგებ,
ხვალე სკან დუდშე ფირქენქ –
ენა შურო ვეგებგ.
ბოშ:
– მურე ძღაბ და ვარე მორსხა,
ამარ–ამარ ბწირდუქ.
სკან მეტ მითინს ვემიპონა,
მუჟამ დიდ ძღაბ მირდუქ.
ძღაბ:
- ტიტუ, ენა მურე მიწუ
დიხა მუნოცუმილქ!
ჭკვერას ორდა, ვაგაიგას
მუაჩქიმქ, შუმილქ.
ბოშის ათაშ ქოუწინს,
უკულ მიდეტკარცალ…
ბოშ:
– შველაჯგუა, სკან მასკვამა
მითინ ვამძირ სკანცალ -
მუასკანქ ვარდო, ჟიშე ქირსექ
გიმილასინ ხოლო,
თესი მუთუნ ვეწუდირთ,
ქიგეგ ბოლობოლო.
ძღაბ გამაღეთ ურაგად
ბოშის თაში ვარა,
იშა მუთუნ ვაუსხუნ
ვართ ორქო დო ფარა.
ქიმურს ბოშშა, ქეწალაჸაფ,
ქუდუკვეზუანს წელსი
მუკი–მუკი გაართუ,
ანჯარენსი ბრელსი…
თეცალ რენა ჩქინ ზისნახე,
ჩქინ სკვამ კოლხაშ ძღაბეფ.
თინეფიშ ჸოროფათ ჭვილ
მა ბრელ მიძირ ხანგეფ.
09.09.09 ზუგდიდი