კოლხეფი
ბჟაშ ქიანა ორენია, კოლხა, ჯვეშო თქუანდეს,
სისქვამე დო ნძალაწკუმა კოლხეფს მიშინუანდეს.
მუშ მუკ–მუკი მახორ ერეფს დიხას უნწალუანდეს,
დო თინეფიშ ცირეფს გვანილ, ჩხეშას უდაცუანდეს.
ორქოშ ბჟა დო ჩეშმან თუთას კოლხეფ ულაჸაფუანდეს,
აიეტ დო ფარტაში ნინას ხამშორ უცანდუანდეს;
დო მუნეფიშ შინათ ხვალე ნტერეფს დუც უჭუანდეს,
ჯგირს ირს ოფალაფუანდეს, დო ფურს დიხას ჩუანდეს.
აიეტიშ ლინჯიშ ხოჯეფს დიხას ურკინუანდეს,
დიდ ინგირშე შხურიშ ტყებით ორქოს ეშმარღუანდეს;
შხურიშ ტყების ვერწემ ჭყონიშ ჯას მუკმაბუნუანდეს.
წყარი დორხველო მუნეფიშირდჷ, ცასით უწაწუანდეს,
დო ირი ახალ თუთაშ მორთას ნარტის ოჸუნუანდეს;
მედეა დო კოლხიშ ცირეფი ნდოლოს ოხუმუანდეს,
ანდანერო ზადუნდეს დო ანდას უკათუანდეს.
იაზონშო, ჸოროფილშო, ჭამეფს ოფუნუანდეს,
თე საქვარით შურობუმუს ყურყუმს გითმანწყუანდეს.
მარა კოლხა იშენ კოლხარდჷ, ჟინეფი უფერუანდეს,
ბჟაშ ქიანა ორენია, კოლხა, ჯვეშო თქუანდეს.
ეკენიაშ 14, 2002 წანა.