კოლხიში კირიბეფი
1
არძა ქიანაშ ისტორია ორე მუზემცი,
თე გერგეზობა ვარე ხვალე მუზეუმემცი,
დიხორუნა დო ბარჩხალანა, დღას ვეთებუნა,
გურ გიხვიჩანცი, თე ხვარჩალით დღას ვერჩინუნა,
სი გოხიოლუ, შოშესი დო მუჟამს შუკემცი,
თე ისტორიას იბირა დო გეჩიებუნა.
2
არძაშ მაართა ჭარალუას კირბო ჭარილცი,
თექ მენცარობას კარქ დასკიდუ მუკონჯამილქი,
ევროპელქი დო აზიელქი მერქას გოსკიდუ,
გაღათ შინელქი კოლხიქ ხესი მუჟამს ქასკიდუ,
ფორილო ნამთინ ვადოსკიდუ, აკორაზილცჷ
საწმოხონოთი დიადიხას ნამუთ დასკიდუ.
3
ქომწი, მი ძირუნც უძირაფუშ სასვება მერქას,
დო მენცარალაშ დაჭყაფუშა მიქ ოკო მერთას,
თი ირფელიშე ირფელისი მიქი უგამას,
ვაღირსებელე მითინცი დო ბწუხენთ არგამას,
მუსი ვაკონდა, ველწაშკვინე ხეშე თი ორთას,
ნამუთი მუსი ხესი უღუ მიარე წანას.
4
ნეტე ქუჩქუდას ბრელცი ზიტყვა სოვრე მოურდუ,
თიმწკუმა თინა ონტყოლაშეს ვემინტყოლუდუ,
უგუგებუო ვადოსკიდუ ნამუთუ ბრელხანც,
მუშ ნარაგადის თექ ქიდიტენც დო იშო ვეღანც,
ბონას ულათი შხვასი ირო ნამუთ ორუდუ,
მენჩურუნც ზუღას, სიმართეშა კინ ოკო მერთას.
5
ჩქინი რინაში რომანი რე, მირულე ემერ,
ოინტერესე ორე თინა, არძაში გერე,
გიშანდღულაფირ ფულანდი რე,
დღასი ვაჸორდუ,
თის ირფელ უჩქუ, მარა უკულ
თე რინა ჭყორდუ...
სი ჩე დღალეფი კინე გოკო... დო ინა ვარე,
ქიკნოჩერებე დო გათებე, თექი მეჭყორდუ.
6
ლერსიში ჭარუ ასე თხულენც ეფურინუას,
თე დიადიხაქ თიშ იმენდო ოკო იჸუას,
სარკო რე თენა დო სარკოთი თინათ იძირე,
თე ირფელშენი ანგარინე დო აძიცინე,
მონკა როლი რე, ანწი ვეჸი თიში თირუა,
დეკორაცია ოკო გორე ვარა ითვინე.
7
მითინც ვაუჩქუ თაქი დიო კირბი მუორე,
მუჭოთ ეფუთი დინაფილი, სო ძჷ დო სო რე,
ნასოფერეფი ჭარაშ წინგშე, ვიშო ქაჸათუ,
მუჟამს და ოსურ ტყაშკოჩიქი ვიშ დამონკათუ,
აპ. როდოსული კირიბეფიშ მაგორუ ორე,
ქომორთ ტყაშმაფაქ, საქომონჯო აშ გაკლაჸათუ.
8
ირფელ ვათქუა, სიბორუეს სი ვაკათუქი,
მუჭოთ კანკალე (ინეფწკუმა, მა მიჩქ, ვართ ურქი),
იხალიწუქი, ჯვეშეფწკუმა ასე ვაგარზი
დო ვაიჸორცი მუკორთელი ეთი რაგადი,
ავრე გიკვენცი, სო ოჭიშეს უკოჩანური,
თი ეშმაკური, კუდელურო თაში გარგატი.
9
ჭუას ოლიმუ, ოდო კოჩი რე უშულადუ,
თი გოთანათი, ონჯუათი, გურიშმულათუ,
ათე სერემქი მოწყინაფათ კინ ვაგაცალუ
აგოთანეფიშ გეძირაფა ფარვანაცალი,
ღორონთქი მერჩუ ნძალან თინა,
შურიშდგუმა რდუ,
მინ უკულიში, ვარა წოხლენ გურიშცანცალი.
10
ი ონჯუაქი ბორიასი ხოლო ვაცალუ,
არძაქი ართო უკულ ინტუ მეჩხვერეცალო,
არძაქი, მიდგა თექ გილეშუ, თის უჯინედუ,
ადამიერიშ ეშმაკობა რე უსკილადუ,
ის თინა ოკო, ჸურუობა თაქ რდას მუცალო,
(...ასე ზოთონცი თიში არზი კინ ვაუღუდუ).