კუში სქუა კუ იჸი
კუში სქუა კუ იჸი,
აბა მორო მუ იჸი,
მინშა ოჭიშ ათინუ,
მინ ეუოლ ბუროჸი.
ჩქიმო ეგორჩქინია,
ჩქიმ სახეში მანგითუ,
დუმოგურე ხაჩქუა,
გიშაბგორი ღანკითუ.
იბჸოროფე მუმა დო
იბჸოროფე ნაია,
მოთალეფი ქომცენა,
მუჭოთ ღალსუ ხაია.
ვაკომწყუმუ მითინშა,
შხვა ღორონთი ვა ბწანსუ,
შურშე ლექსეფ მალულა,
გეჸუნელეფ რანწკასუ.
გინვოჯინექ სოფელს დო
არძო თეში ხუხინუნს,
მუკოცენა ხილეფი,
კუ დემცალო ბუღინუნს.
შაყარანა ორქოსუ,
შაყარანა ვარჩხილსუ,
ადესასუ ტკუცუნა,
ღულა კუჩხით ჭყანჭყილსუ.
სი მუთუნი ვაზირა,
ბაბასქუა დოროთე,
კოჩანობას ათხოზი,
თინა გირსხენს ღორონთმე.
მარსხებელი სით მირსხი,
ვადგოკორდუ მუთუნი,
ფარა გიღუნ- მიესხი,
ოღუზაფე თუთუნი.
ბურჭი რენ-და მუს ღოლა,
მუშით დიჭვუ ოჭვალი,
შუბარზამსუ ჩუთხინე,
ღია გითამონჭკალი.
სი გიჸორდუ ინგირსუ
ქუაშ გეჭუმინაფა,
ვეკორინა პიტათუ
რინაშ მუკორთინაფა.
ჰოდო, ართშა გოლაფირს
ვეგელუდას მუკორთა,
ქანა თეში ქიდიტე
ღურუს ხოლო უჸორდა.