კუშ ფლეიტა
ართი წყარმალიშ ძგას, კუ ეკოხედჷ დო ფლეიტას მიოგანდჷ. თე მუსიკაწკუმა ართო ნჯილოეფი, მუნჭყვეფი, ფარფალიეფი, გვერეფი დო მაიმუნეფი სხაპუნდეს.
ართი დღას, მიდგარენი კოჩიქ ქოგეგონჷ თე მუსიკაშ ხონარი. „აჰა,“ იფირქჷ თიქ. უღურალეთ, კუ იჸუაფჷ თინა, მუსიკას მიოგანსჷნ. "ძალამი გემუანი ქიჸინ ქო თე კუ, ღორონთუმე.“ თაშინ, ქოდიძახჷ თიქ: „ვო, კუ! ქომოძირე აკა სქანი სქვამი ფლეიტა.“ მიდართჷ კუქ გითოჸუნელო, ხიბას ქომიოდირთჷ დო გელეღჷ მუში ფლეიტა. მოსანჭჷ კოჩიქ თინა მუში გოხოლუას დო ვარინ, ქომიოტყობჷ, ქოქანჩჷ ხე ყორყელს დო რულა-რულაიათ მიდართჷ. კუ ოცადუდჷ ქომეუღვარაფუდჷკონ, მარა შურქ ვა ეკაქალჷ. გურშა ქომიკიხუტოლუ ფლეიტა დო დოწკურჷ თოლეფი. მუჟამც თე კოჩიქ მუში ფაცხაშა ქომიანჭუნჷ, გეჭოფჷ კუ, ქენახუნუ ღობილს დო დოკილუ თინა. უკული მუკართჷ ბაღანეფს დო ქოდუჩინჷ: „გალე ვა გითაშქვათ ათე კუ ღობილშე.“ უკული, მუქ ვეშა მიდართჷ. ბაღანეფქ ლაჸაფი ქოდაჭყეს. კუ შური უქალუო მითოხედჷ მუში ღობილს დო თი კოჩიშ ნათქუელშენ ფირქენდჷ.
უკული, ართი ჰამო მუსიკაშ მეგამა ქოდიჭყჷ მუში ფლეიტათ. ბაღანეფქ თენა ქოგეგონესჷნ, ხათე ქომირულეს ღობილშა. „სი რენო კუ თეს მიოგანქინ? იკითხეს ბაღანეფქ გოჩაკვირელო.
„იახა,“ უგამჷ კუქ დო მეგამას მუკართჷ, რახანს ქოძირჷ, ნამუდა ბაღანეფს ფსუაქ ქაჩანესინ. უკული გაჩენდჷ დო მიოტუ მეგამა. „მა სხაპუა ხოლო მიჩქჷ, ფლეიტაშ მეგამაშ უჯგუშო,” თქუ თიქ. „ვა გოკონანო ძირათინ?“ „ჸოჰ, ქო, რთხიინთ!“ ქომიონგარუ ჩქიჩქუქ. „მა გოძირანთ დო დუგოგურუანთ მუჭო ოკო მიოგათ დო სხაპათ ართბორჯულონ,“ უწუ კუქ ბაღანეფს. „მარა დიო, ათე ღობილშე გაგითმაშქვათ ოკო თქვა. აქ დოსართე ვა მიბაღჷ.“ ბაღანეფქ ხიოლით გაგითაშქვეს გალე კუ დო იქით მუსიკაშ მეგამა დო სხაპუა ქოდაჭყჷ ჰალამო. ბაღანეფი ძიცას ღურუდეს დო ტაშის მიოგანდეს, რახან ასეშახ, თეცალი მერეთი მუდგარენი დღას ვა აფუდეს ნაძირეფი დო ოხიოლუდეს ძამს.
უკული, კუქ გაჩენდჷ. „ვა მიოტუა!“ ქომიოღვარეს ბაღანეფქ. “ჸოჰ,” ქომიოკუსუ კუქ. „ჯერღვიქ აკმასქვჷ. ჭეს მიდურქ და, ეგჷბა მუმაშქვას... „გვალო შორშა ხოლო ვედა,“ გართხილჷ კუ ჭიჭე ცირაქ. „ხათე დიფრთუქ, ვა გაშქურინან,“ უწუ კუქ ბაღანას. „თქვა თაქ ქომომიცადით.“ გითაჸუნჷ კუქ ხოხუა-ხოხუათ დო ტყაშა მითილჷ. თოლს ქომიკაფორჷ დო ვარინ, მუში ჸუდეშა ქოგიოლჷ მუთ შეულებუდჷნ თით.
კოჩიშ სქუას ვა უძირჷ კუ თიშ უკული. მარა ამუდღა ხოლო, თქვა ჸუჯის ჯგირო ქოდოუჸოთანთჷ-და, ქოგეგონენთ ტყაშე გითმალი ფლეიტაშ ჰამო მუსიკას.