ლუკაცალო კორინელი
ათე ჭველეფჲ - ტყაშ კოჩეფი
ხობწყარს ფინქრო გართუნანი,
ნეტე თინა ქარჩქინანი
ფსუას მუშენ ჭორთუნანი?..
მუქ მიჸონეს შქველარაშე
ჸოროფათი ფურინელი,
ღურა დღაშა ოკართალო
ლუკაცალო კორინელი...
ცას კოღონა მიკმაღურუ
ზუმინით დო ცარკალით,
თუთას წყარშა გენურთუმუ
დალუაფშე ცაშ კარით...
თოლონჭაფუს სერი მაბუ
წკურუმია უჩა სერი,
ჸურანსუ დო ღირინუნს
შკირენულო გვალას გერი...
ოკუმოლშე მიღირკოლუ
ჩე დო უჩა კუმაშ თოლი,
რსიოლია ოდაბადე
გოლვაფირო, სკანო ბგორი...
არკვანს დემი ეშაჯანუ
ეკოფშაფილ თუთაშ ნერი,
მასკურ ჯალეფს გარსიოლუ
ართო ხანგა, ართო შერი...
მუს ვაძირუ თაკარელო
გობარჩხალერ დალიასი,
თუთას ჩხანა ეკოთხოზუ
მურიცხეფი გარკიანსი...
შარა შურსი მიკობონდღუ
უღურალო ერჩქინელი,
მუ ნჯარეფი ემირცხონუ
ჭველაქ დიშკათ მერჩქინელქი...
გორდის ბორკეფჲ მოურხინუ
ოჭკადურეშ აბარწასი,
ხოჯ ჭკადილო საქვარეფსი
ოხვამალო ოკვანწანსი...
ჟინღორონთიშ ოკნანწყუა,
ჸოროფათი ფურინელი,
ოხვამეში ოკართეშე
ლუკაცალო კორინელი!...