მაბირე ჯაშ არიკი
ყოფერენა სუმ ჯიმალეფი. სუმ წანას ნოკეთებუენა, სუმ წანაშ უკულ ჯიმალენქ მირაგადუეს, ნამდა: -ათე დო ათე ქიანას ორენია ართი მაბირე ჯა, ნამუთ ირნერ ნინაშა იბირსია. თიშ რჩქილას ვაუჯგუნია მუთუნი.
გინოჭყვიდეს ჯიმალენქ, ნამდა ათე მაბირე ჯაშ ფურცელი ქიშუანი დო მიდართეს. ქიმიოდირთეს სუმ ბორძალი შარას. ართის მიკოჭარუდუ: მით თე შარაშა მიდართასია, მშვიდობიანო დირთასია”. მაჟირა შარას მიკოჭარუდუ: "მით თე მხარეშა მიდართასია, გვიანიშახ ვედირთასია".
მასუმას მიკოჭარუდუ: "მით თე შარაშა მიდართასია, ცოცხალი ვედირთასია". უკულაშ ჯიმაქ გინოჭყვიდუ: "მა მიდურქია თე შარაშა.” უნჩაშიქ უწუუ:
-სი ე შარაშა ვაგმატინექია. სქან მანგიორო მა დოვღურელედავა.
მარა უკლაშიქ ვაურჩქილუ დო მიდართუ. მეურს, მეურს დო ქიმიოდირთუ ართ ოჯახის. მიკაჯინუნ, ყუდეშ წოხოლე დგუ მაბირე ჯა. ფერს იბირს, ფაერ ღურჭულანს, ნამდა ათაქიან გოჯინას დო რჩქილას მუთუნ ვაუჯგუ. თუთაშელა სერიე დო ჯა ირფელაშო აყვავილებულო ჩქუ. თე ბოშიქ გინოჭყვიდუ ნოყველაშ ხირუა. მარა მუნერო იშელას, ჯა მაღალიე.
გილუ-მილუ დო ქოძირუ, ნამდა ყუდეს კიბე მიკოპონუ. მოხთუ თე კიბეს ხე დო მიკმუღუნ თეშ, კიბეშ დუთქ ქიგიანთხუ ორთვალს. ქეგეგუ მინჯექ ბურგონი, გეგმოლუ გალე დო ღორუუ:
-მინი რექ სია? მუ რჯული კოჩი რექია, ამსერ ჩქიმ ყუჩა ქომოირთუმუნია?
-პატონია, ეთი მაბირე ჯაშ ნოყველა მოკოდუა ვიხირიკოვა, -გოტირხუ ე უკლაშ ჯიმაქ.
-აბა, მა ართის დაგავალენქია: ათე დო ათე კოს ჟირ რაშეფი ყუნსია. ქემერთი, მიოხირი თი რაშეფი, ქომომიყონი დო მა ათე მაბირე ჯაშ ნოყველას ქემერჩანქია.
მიდართუ ე ბოშიქ. იდუ, იდუ დო ქემერთუ, რაშეფი კირუნ თექ. განჯუ კარი, გენწყუ თე რაშეფი დო მოყუნს. ე რაშენს თურმე ზარეფი მიკნობუნუე დო ზარენქ რეკუა ქიდიჭყეს. ქეგეგუ მინჯექ, გეგმოლუ დო დიძახუ: -აი, მინი რექ სია?
-მავა რაშეფიშ ოხირუშა მოვრთია, -უწუუ ბოშიქ.
-აბა, მავა ზეთუნახე ძღაბი ქომომიყონია დო რაშენს ქემერჩანქია, -კოჩქ უწუუ.
მეურს, მეურსი დო შემეხვადუ ტრიალი მინდორქ. ათაქ ოდიარეშ მეტი მუთუნ ვეგიპალუუ. ვართ ჯა, ვართ ქუა, ვართ მუთუნი. სოდგაე შორს მუდგაე ქომოჩქუ, მარა მუ რე, ვაუჩქუ თე საწყალი ბოშის. ხეს მუთუნი ვაუკებუ დო ოშკვირუ. დეხოლუუ დო ქოძირუ, გერი მურსი. "ნამდვილო ომჭკუნსია, -ბოშიქ იფიქრუ, -ჩქიმ სიცოცხლე კოროცხილიენია", მარა გერქ ქომორთუ დო: -გომორძგუა სკანია, -უწუუ ბოშის. -გომორძგუასია. -ჩქიმდა ნუგოშკვირუ, მორთი, აი, ოჭიშის ქეგემდოხოდი დო მა გირსხენქ გაჭირებაშევა, -გერქ უწუუ.
ქეგედოხოდუ ე ბოშიქ გერს დო მეულა. ართ დიხას გაჩენდეს.
-ასე სი ათაქ გამიჩენდი დო მა თი ზეთუნახე ძღაბის ხელათ ქიმიპონანქია, -გერქ უწუუ ბოშის. დასურო, ვეგშუყოთუმუ გვერდ საათს დო გერქ ლურენჯო ქიმიყონუ ზეთუნახე ცირა. -ასე მა თეს გოვოკურცხინუანქ დო თეშ მოვონწყუქ, ნამდა თექ სი ქოიყოროფუასია.
დასურო თაშ ქოქიმინუ.
-ასე თენა სი ქოიყუნდას ოსუროვა, -გერქ უწუუ.
-ვარი, პატონია, ენა რაშეფიშ მინჯეს მევუყონეოკონია, -ბოშიქ თქუუ.
-ე საქვარს მა მიკულუანქია, -გერქ თქუუ, -სი ოსური დოფულია დო.
გერქ გინირთუ მზეთუნახავო. ბოშიქ ქემეუყონუ რაშიშ მინჯეს. ი კოჩქ გეხარუ დო ხელათ ქემეჩუ ე რაშეფი უკულაშ ჯიმას, ართ ქისა ოქროშ ფარა ხოლო ქემეჩუ. გიოხუნუ ე ბოშიქ ოსური რაშის დო მაბირე ჯაშ ქიანაშა მიდართეს. შარას გერქ ხოლო ქიგიოჭიშუუ:
-თექ ქემეურთია -და, რაშეფი დო ოსური დოვფულათია, მა რაშეფო გინივრთუუქია დო თი კოს ქემეუყონი ჩქიმ დუდია. უკულ თქვა მეუთია დო ათე დო ათე არდგილს გემიცადითია, -გერქ უწუუ ბოშის.
დასურო თაშ მიქცუეს. გინირთუ გერქ რაშეფო დო ქემეუყონუ ე ბოშიქ მაბირე ჯაშ პატონს. იქ გეხარუ დო ქემეჩუ გვალო დიდი ნოყველა დო ფარა ხოლო. მომეყონუ ბოშიქ რაშეფი, ოსური, მოლეღუ ფარა დო უცადუ გერს. გერქ ქიგიოჭიშუუ დო უწუუ:
-ასე სი მიდურქია, დო ართ ტრიალ მინდორი ქეშეხვადუნია, თექ ართ ჯა გეჩანდას იყინია, თიშ ჯინჯიშა ქემეურქი, ლურ მეგენდომებუ, მარა მუთუნერო ვედილურუა, ვარა დიღუპუუქია, მთელი სქანი ნახანდილა წყარიშა ქინოიცენსია.
გიგნოჯვიდეს ართიანიშ გერქ მიდართუ მუშ შარაშა. ენეფითი მეულა დასურო ქეშეხვადუ თე მინდორქ.
-ოხ, დიდაღურელია, მუჭო მალურუაფუნია, ბოშიქ თქუუ, -მორთი, ქიდივლურუათია.
რაშეფი ჯას ქიმკაკირეს, მაბირე ფურცელი შკას ქინშედვეს დო ქიდილურუეს.
თაქ მიკილუ უნჩაშ ჯიმაქ. ქიგიოჯინუ; ა, მუშ ჯიმას ვალურსო ამარ?! "მა მუდა წანაე გინულირ ვორექი დო მუთუნქ ვამაშუუ დო თე ირფეელი ქუშიიბუნია", დეხარბუ. დოყვილუ ლურენჯი ჯიმა, დოთხორუ. ირფელი მოლეღუ დო მოლართუ. ყუჩა ქომორთუ, ქორწილიშოთ ქიდიჭყუ მზადება. თე გერქ ქომორთუ კინ თე არდგილიშა, გაცოცხლუ თე უკულაში ჯიმა.
გიზილოკუუ თე ბოშიქ: "მუსხანიენია ნოვლურუექია”.
-ატ, სი ღურელია, სოენია სკან ოსურია, სკან რაშეფი დო სკანი მაბირე ფურცელია. ჩქიმი სიტყვა მუშენ გოტახია. ა, სი თე ძონძეფი, ქინკიქუნია, სახეს ჭარიკი გიკეთია; ამსერ სკანი ჯიმა იქორწინებუნია, თექ ქემერთია დო ხალხის ქოთხიია: შკა შეფას ქოდოიდგანია სკანი დო ქემერჩანია ღვინი, ყვალი დო ქობალია. ჟირი სიტყვაშ ნება ხოლო ქითხიია. უკულ დიო ყვალს ქოკითხია, უკულ ქობალს დო უკულ ღვინსია: "მუ გარჭირებუნანია".
მა თექ ვიპიიქ ფულირი დო თინეფიშ მანგიორო მა გიპასუხენქია.
ქოთ თეშ მიქცუ თე ბოშიქ, მუჭოთ გერქ დაარიგუ. შკა კამპანია ქორე დო ყვალს ოკითხუ თე ბოში:
-ყვალია, სი მუ გარჭირებუ, ქომიწიია.
-მუა და, მომჭვალესია, გომწურესია, დომკვეთესია, გიშამიღესია, დომჭკირეს დო ასე ამარ მჭკუნანია.
-ქობალია, სი მუქ გაიჭირდუა?
-მუა და, დიო ქომომიყონესია, უკულ დომქუესია, დომზუესია, დომჭვესია დო ასე ამარ მჭკუნანია.
-ღვინი, სი მუქ გაიჭირდუა?
-მა ვამკითხათია, ჩქიმ დუდიშა ირფელს გიგნულებუნია. დიო ბინეხი ვორდია, უკული ყურძენია, უკულ დომჭახესია დო ასე მშუნანია. ბრელი მოცქვანს დო ბრელით მოგორანსია. მარა სი მუ გარჭირებუნია, სი ცოდავა გვალა კონკეფი მიკორქუნსია?
-ვაი, თქვა ცოდეფია, ასე ჯგირო ქომირჩქილითია: სუმი ჯიმალეფი ვორდითია, სუმ წანას ყუდეს ვაკეთენდითია. უკულ მივრაგადეთია, მაბირე ჯაშ ნოყველა ქომიშიიბუდესიკოვა. მიდავრთითია დო სუმ ბორძალ შარას ქემვოდირთითია. ართის მიკოჭარუდუა; "მიქით თაურე იდასი, გამარჯვებულო დირთას”; მაჟირას მიკოჭარუდუა; "მიქით, თაურე იდასი, გვიანო დირთას". მასუმას მიკოჭარუდუა; "მიქით თაურე იდასი, ვედირთას". ჯიმალენქ შემეცოდუა, თინეფიშ ღურას ჩქიმ ღურა ვოსხუნე დო თი შარაშა მა მიდავრთია. ირფელ ქივშიი დო ყუჩა მივშია. შარას ქოდმალურუა; უნჩაში ჯიმაქ ლურენჯო დოპილუა, თექ დომთხორუა. მიდგაქიე ქომორთუ დო გამაცოცხლუა. ყუჩა მოლავრთია დო ამარ მუს ვორწყექია: ჩქიმ უნჩაშ ჯიმა, ჩქიმი ოსურიშა გვირგვინს გითმიდგუნსია.
გეგნიწყუ ჭარიკი. ოსურქ მიორკიოუ, გეგნოსხაპუ დო მუშ ქომოს ქახუტოლუ.
ხალხიქ ოჭოფუ უნჩაშ ჯიმა დო რაშიშ კუდელს ქინკუსკუეს.
ოსარგულუუ რაშიქ დო გიშალუ შურქ.
გეჩაღუ ქორწილქ. გემარჯვუ სიმართლექ.