მათე. დ.25; ხ. 14-30
XV. ვარენო კოჩი მიიშასჷ ნი შხუადო ქიჸუანაშა დო ქიიჭანუასი მუში ჭკორეფი, დო მიანდასჷ ნი თინენსჲ მუში მონაგეფი, ნამუთნეესჲ მიანდუ ხუთი ქანქარი, დო ნამუთინეესჲ ჟირი ქანქარი, დო ნამუთინეესჲ ართი, - თითო კოსჲ მუშ-მუში ძალიში გვარო, დო ხათეე ხოლო მიდართჷ. ნამუქჷთი თი ხუთი ქანქარი ეჭოფუ ნი, მიდართჷ ომუშეებაფუუ თისჷ დო ქჷმუუძინჷ შხუა ხუთი ქანქარი. ათაშინეე თიქჷთი, ნამუქჷთი ჟირი ქანქარი ეჭოფუ ნი, ქომუუძინჷ შხუა ჟირი ქანქარი. მარა ნამუქჷთი თი ართი ქანქარი ეჭოფუ ნი, მიდართჷ დო მოთხორჷ დიხა, დო დაფულუუ თი მუში პატონიში ვარჩხილი. ბრეელი ხანიში უკული თი ჭკორეფიში პატონქჲ ქომორთჷ დო მორაგადება ქიმინჷ თი მუში ჭკორეფი წკალა. ქეწჷმოდირთჷ, ნამუქჷთი ხუთი ქანქარი ეჭოფუ ნი, დო მიართუ შხუა ხოლო ხუთი ქანქარი დო უწუუ: "პატონი, მა სიი ხუთი ქანქარი მუჩი, - აჸა, თენარე შხუა ხუთი ქანქარი თისჲ ქომუუძინი ნი". მუში პატონქ თისჲ უწუუ: "ჯგირი გიქიმინჲ, კეთული დო სანდო ჭკორი, - ჭიჭესჲ სანდოქჲ იჸიი ნი, მა სი ბრელსჲ მიგანდვენქჲ. მოშეელი სქანი პატონიში ხიარულობაშა". ქეწჷმოდირთჷ, ნამუქჷთი ჟირი ქანქარი ეჭოფუ ნი დო უწუუ: "პატონი, მა სი ჟირი ქანქარი მუჩი, - აჸა, თენარე შხუა ჟირი ქანქარი თისჲ ქომუუძინი ნი". მუში პატონქჲ თისჲ უწუუ: "ჯგირი გიქიმინჲ, კეთული დო სანდო ჭკორი, - ჭიჭესჲ სანდოქჲ იჸიი ნი, მა სი ბრელსჲ მიგანდვენქჲ. მოშეელი სქანი პატონიში ხიარულობაშა". ქეწჷმოდირთჷ თიქჷთი, ნამუქჷთი ართი ქანქარი ეჭოფუ ნი დო უწუუ" "პატონი, ქომიჩქჷდი, ნამუდა რისხვიანი კოჩი რექჷ ნი სი, - მიიწენქჲ, სოდეთი ვა დოთასეე დო კათანქჲ, სოდეთი ვა დაარღვეე ნი დო მაშქურინჲ, მიდავრთი დო დოვფული დიხასჲ თი სქანი ქანქარი, - აჸა, სქანი წკალა რე". მუში პატონქჲ ეშ გაამათჲ თისჲ უწუუ: "უბადო ჭკორი დო ორგული! ქოგიჩქიდჲ ნამუდა მიიბწენქჲ, სოდეთი ვა მითასჷ ნი, დო ბკათაანქჲ სოდეთი ვა მირღვაფუ ნი, - სი ოკო დოგიდვალჷდიკო ნი ჩქიმი ვარჩხილი ოვაჭრებელო დო ქიმიიფში ნი, თი ჩქიმი ნაძინუამო ქომოუჩამუდუკო ნი. გაგიწუუღითჲ თისჲ თე ქანქარი დო ქემეჩითჲ თისჲ, ნამუსჷთი ვითი ქანქარი უღუ ნი, ათეშენი ნამუდა არძოსჲ, მისჷთი უღუ ნი, მიაჩასჷ დო მიაძინასჷ დო ნამუსჷთი ვა ვუღუ ნი დო უღუ ნი, თიქჷთი მიდააღასჷ თისჷ, დო თე ურგებელი ჭკორი გააჸოთითჲ გალე თი უკუმელსჲ, - თექი ორდასჷ ნგარა დო კიბირიში ჭკირჭკინი".