მამანტი კვირტიას
(პასუხი)
მამანტი კვირტი მოგიჭარჷ, ჩქიმდა წიგნი წებკითხი,
წაკითხირიშა ადრე მიჩქჷდ, ჭკუა ორდუ სქანი თხითხი,
ვაღირჷდჷ პასუხიშა, მარა ხეთე რუჩკა მიბთხი
დო თეცალი პასუხით „დიდი პოეტი“ მოგიკითხი.
სოდგარენი რეკჷნდეს, მარა ვაგარგებუ ჯგირო,
ნიტე მუქ დჷგაბადჷ ქიანასჷ თეცალი ვირო,
თეცალი დიდი გირინობას სქანდე ქჷველჷდი ირო,
დიხას თელო ქიმთგოთხორა, ანწი გინგართუქუ ჭირო.
სქანი ჸუჯიში ლაბირინთი მუთუნც ვაგეგონენც ვარა,
ვართი ლერსი დო ვართი პროზას გჷ თი სქანი მუნაჭარა.
ცქვაფა ჭყალათ გასჷმენი ჸუცუ ალგოსქუნო ქარა,
ჯამაგერცჷ გარზენანი მუჭო მედინაფე ფარა.
გერბიშ სი მუ გჷგაგინე, მუჟამც რექი ტყაში სქუა,
მოუკუნი სადიოს, ქიჩინი სო გოჭირჷ ფუა,
კოლო ჭურა გინორდგენი თექ მიშაძჷ ფალო ქუა,
დანები სისუნელეს დუდი, კუჩხის ქეკგოტახაფუა.
ხუთი წანაშ პლანც ირაჸუა, მუჭოთ კრილოვიში ჭანდი
მუთა მიშაიხვარებუნი ენა ორე თიში ფანდი,
ფაფრიკეფიშ შენებას ითამ სითი იბურსანდი,
ტყურა გაფუ, იმ დროს ჭანდი, ბაბსქანიში გირინც ხანდი.
ჩქიმი ლანძღუა გაგიბედებუ, ასე ვაკორჭუნო ბედი,
ათეში უკული მუსუ ფირქე, ვარა მუშა გიღუ მენდი
გჷმათუთაქ გოგურგინჷნ, ითამუდო სით დომენდი
ხოჯი ოხონუშე მიშჷნი ტყურათ ქას მიკოხედი.
რსიოლი ელაფირი გაფუნი, ეშენი ტყურათ მუთას ბთქუა,
რსიოლც მუთა აღოლე, დუც ვემშაძ იშენი ჭკუა,
მედიცინას ირაჸუა, შხვაშო მიგოჩქ სქანი ჭუა,
მედიცინაში ლაკვაჩხირც ტყურათ ვემეილაქვათუა.
სქანიცალი ჩეჩმაში პოეტეფს დეჯერი ირო ქუდვოფორა,
რითმას ქათუჸუნუა დო იშო ნწვირეს ქიმთქოთხორა.
სქანი ნაჭარა თიჯგურა რე, მუჭოთ ბამბეში ძაფი ნტკორა.
დოკილუე სალებიო, გირჩენქ ალეს ნჷმ ოგორა!
07.08.1932წ. ქ.ზუგდიდი.