მარგალური ჭყალა
| მარგალური ჭყალა by [[Author:ფრიდონ აბაკელია|]] |
უჯვეშაში კათეფიშ კაბეტი აწმაჩამალეფი დო შხვადოშხვა გურაფეფიშ, რელიგიეფიშ ნერჩიში დჷმადვალარეფი ჟიპიჯზიტყვიერო გინოჩანდეს კათას მესიაკონობას. ამდღარი მარგალური ნინა უჭარჷ ნინა რე. თეში უმკუჯინუო, კათაში შინას დოსქილადირი რე ბრელი ულირი ვითოშწანეფიში კჷნოხ ჸოფილი ამბეფი, მითეფი უჯვეშაში რელიგიეფიში რინაში გჷნაფეფი.
მა მოკო თქვანი თოჸუჯი მუკვორთინუე თი ფაქტიშა, ნამდა მარგალეფიში შინას თელი ზიტყვათ დოსქჷლადირი რე არგონავტეფიში მოულაში ფაქტი სამარგალოშა (კოლხა). მენცარობას საორჩანოთ გერე მარგალეფიში დო კოლხეფიში ართ კათათ ჩინებაში პრობლემა. როდოსელც „არგონავტიკას“ მოშინაფილი აფუ კოლხური ნინა, მარა მარგალურწკჷმა თიში ართობას ბრელი მენცარი ვაჩინებულენც. როდოსელი III უკუნიში ავტორი რე. მარა არგონავტეფი მოშინაფილი აფუ ჰომეროსის „ტროაში ლჷმას.“
კონკრეტულო მუ შჷ მარგალურ ნინას არგონავტეფიში მოულაშენი ნოღა აიაშა? არგონავტეფიში მოულაში თელი ტრაგედია კოლხეთშენი, კოლხი კათაშენი მარგალეფც ჩუალირი აფუნა ჭყალას, ნამუთჷ თაში ითქუალუაფუ:
სი ქჷმკონ – არგოს– ედა;
სი ქჷმკონ – არგუს – ედა;
თაქი „ქჷმკონ“ დო „ედა“ კილოთაშწმოხონი (ზმნისწინი) დო ბოლოგიორთაშე (ბოლოსართი) რე. „არგოს –არგუს“ – ხვამარდიში ჯოხო რე. მაჭყალი ურაგადჷ ოჭყალც: მიდაირთუმდას დო მედინაფედავა თინერო, მუჭოთ ხვამარდი „ არგოთ“ დინჷ მედეაქ, დო მუჭოთ დიწეს ხვამარდი „არგოში“ ბაძაძით თიში გჷმაჸვენჯეფქ, აიეტიში ჸუდეშარეფქ. სამარგალოშე ჭკორეფი რომალეფც, ბერძენეფც, თურქეფც ხვამარდით მეჸუნდეს, დო თინეფი ნამთინი ვერთუდჷ. დო მარგალური ფსიქიკაქ არძო ხვამარდი „არგო-წკჷმა,“ გაართოიან, დო თენერო კათაში დინაფას „მიკონარგუსუა“ ქიგიოდუ. არგონავტეფშე ინფორმაცია კათას წინგეფშე ვემიაღებედ, ვართ როდო-სელიში „არგონავტიკაშე.“ ესე იგი ამდღარ მარგალურ ნინაშა მორაგადე კათაში ჯვეშეფი რდეს არგონავტეფიში ალმახანურეფი დო კოლხეთშა არგონავტეფიში მოულაში მოღალუეფი თიზმათ ტრაგიკული რდჷ, ნამდა თენა ირფელი ჭყალას ქიგნანქირუეს.