მარყე-მარყეთ ეკოპუნა ბორჯეფი
მარყე-მარყეთ ეკოპუნა ბორჯეფი.
თოლიშ სინთე თუთას ქიმშაჭვათაფე.
მოლამბირი შოშეს ლანდი მონჭაფუ,
მარჩებელ დო მარაგვინჯე, მოთარე.
მარცახეფი ქიგმობინუ ბორიაქ,
მარცქინე რე გორჩქინა დო ორთაშე.
ორცხონალო ნდოლო აკომგორია,
მარეხეთჷ ვორექია დორთაშე.
ჩქიმ მარჯვალი ხოლო ოკო ქოძირე,
მასილარი შური აკომკორობი.
ცაშ კიდირცჷ სერდაშ ბჟათჷ დობზირექ,
კოდმე-ტკილი კოდორელი მოროხი.
მაფალაგა ცხენიშ ძუათ დოკირე
ჩქიმ რინა დო სოთინ ვაკო გონწყუმა.
მაქადარი ვორექ შურიშ მოთირე,
მაჩხაპელა ჭვემათ მიჩქუ დოწუმა.
მაქურსალო ვეგლაფხვადა გიჩქუდას,
ჭარა რექ-და, ჩქიმდა მუთას გალჷმე.
თის ქობძირჷ ბირგულეფი გიშქუდას,
ვედეღორა, სი სოთინი გალინე.
მეშვე თუთა, ოხუტოლუ გაბარეფც,
ოსოფინალ კინ აღვენუ არგამათ.
ლილუ სქუა ხეშე გეჲოჭაბარეს,
ამსერ თუთა გილაგორუნც ბაღანას.
ისხარსხალჷ ოვარდე დო ოსხულე,
ოსხუნური ირფელც ქუმონარტებუ.
თაქ ვორექჷნ, ვითოჟირშა დოფსხუნეს,
ჩქიმ დუც იშენ მა ქიგვოდვი მარტებუ.
ოტომბეშე მა ჩხომცალო გეშაბლი,
ოფონც იშო კალმახეფ ცას ჯუნუნა.
ამსერ თე ცას ბორია რე გერშვილი,
კალმახეფი მარჩხას ვემჲაჸუნუნა.
მარყე-მარყეთ ეკოპუნა ბორჯეფი.
თოლიშ სინთე თუთას ქიმშაჭვათაფე.
მოლამბირი შოშეს ლანდი მონჭაფუ,
მარჩებელ დო მარაგვინჯე, მოთარე.