მაჭვერია
მუჟამ გიღუ გასაჭირი,
მუჟამ გურსჷ გაჭვენია,
ქიგიშინი, ხანდათ ჭვილი,
ჩქიმი ჯგირი მაჭვერია.
მუნაფა რე, ჩხანაია,
ნაჭოროფა, ნაჭვემია...
იკილოთ დო იცხვაბარჷ,
დღას ვესვანჯჷ მაჭვერია.
სოდე გეხიბჷ ხუმლა დიშქა,
სოდე ღობერი მიკოღობუ,–
ჯაში ჩხვიჩხვიშ კორკონტიშა,
ჯა დო ქუას თენა ობუ.
მელე ურც თუ მოლე ურცუ,
გილეცხვანტალ, გილოურცუ,
ჯოგო რე თუ ხვათახვალე,–
მეუღუ დო მეუნთირუ
ორინე დო ოხვარხვალე.
აკნაულა აფ ქიანა,–
მარაკა დო მუშ აგვარა,
ირდიხაშა თეს ოჩქარუ,
ართო მიოჩქ რზენ დო გვალა.
დღაშ დო სერით გილერსიოლ,
გოჭყოლადირ აფუ ლური,
ვაშურდუ დო ვამარსიოლ,
მუშობაშა ოლუ შური.
მოხანდეში უღუ რინა,–
თის მუთუნსუ ვაჭვენია,
ხანდაშო რე გუნარჩქინა,–
უშქურანდი მაჭვერია.
ხვამარდიში ხვამილი რე,
შარას გეწურაფილი რე,
შხვა შარასუ ვაგორუნსჷ,–
ართის გოლუაფირი რე.
იშენ შიშით ვავორექჷ,
მა კირილი, მაჭვერია,
სოთინ ხუჯიქ ვეგართასჷ,
ვემედინა მაჭვერია...
ორაგადეს გიწინქ სქუა,–
სიტყვას ქელაიჟუმინუა;
ვეჩქარა დო ვემეჩირთა,
ვეჩანუა ბაბა ფსუა,
ვემინდომა ფურინუა.
ცაში ცხოვრებაშ მუ გიჩქუ,
რინა რე თუ ურინუა,
ჟინიშ მინჯე ქუმურცუ დო
დიხას ქუდგობურინუანს!...
მუჟამ გიღუ გასაჭირი,
მუჟამ გურსუ გაჭვენია,
ქიგიშინი, ხანდათ ჭვილი,
ჩქიმი ჯგირი მაჭვერია.