მახაჩქალი ტრიბუნაშე
გასაგები ნინათ მოკო
მა ქოფთქუე, ჯიმალეფი,
მოკო კუნტაშე ქიფჩუე
თაქიანი პინალეფი.
თაქი ოკო ქობშინუე
მა მარგალი მოხანდეფი,
ჯვეში დო ახალეფი,
მაგურაფუ მაჸალეფი.
მარგალეფი ორე დიდი
ნაწვალებუ თავადიში.
თაქიანი მოხანდეფი
ორდ მონეფი თინეფიში.
პატჷნც ქუნჩო მუკაქუნდუ
ტყები ჩქჷნი ჯვეშეფიში,
მუშა მარგალენც უღუდუ
თინეფიში დიდი შიში.
ნიჭი ყაზაყიში სქუას
მუფერი უღუდუკონი,
იში ნებას მი არძენდჷ
მუთუნი ქიგურუკონი.
კჷსერც ქუხვამილუანდეს,
მართალი თიქ ქოთქუკონი.
პატჷნი თის ოცადჷდჷ
მარგალქ ვეშიგჷნჷკონი.
თი ბორჯის მარგალეფი
ვაიშეშეს გურაფილი,
მუშაქ ქეშიგჷნჷკონი,
ხათე იჸიდ შქვიდაფილი.
მარგალი მუშაში ნიჭი
ორდ უკვალეთ დჷნაფილი
დო უნიჭე თავადეფი
რდჷ სათუო გურაფილი.
ჩქჷ თავადიში კანონეფი
ვამოძირანდესჷ დღასჷ,
მარა ჩქჷნი მთავრობაქ
ქიგმორინესჷ შარასჷ.
მა ღარიბი ვორექი-და,
ვამოგაფუანა ფარასჷ
მუშაში სქუალეფითი
ქიფჩინენთ ასე ნაჭარასჷ.
ასე ჩქჷნი მთავრობაქ
ამარ, ხოლო ხაბუმესჷ,
ყაზახიში სქუალეფცჷ
გიმნაზია გომინწყესჷ.
დღაშა რუმეს ნახვილა
მუშა–მოხანდეში წრესჷ,
ნამუთ დღაშა თავადენცჷ
ხვალე ქართის უღუდესჷ.
ათე ჩქჷნი ოგურაფუ
მიხოლენა განათებას;
თაქი დჷმოგურუანა
ჩქჷ ირფელიში გაგებას.
ანწი ჩქჷთი ვეცადებუთ
ჩქჷნ ტერიში ჩინებასჷ
დო თავადის ვემეფჩანთჷ
უსამართობაშ ნებასჷ.
მუშენქ, ახალი მარდუენქ,
აჰა, ქჷთი გოცალ შარა;
ფარას გეხანტ, ჩქინი ნიშა,
მაგანა დო კვერი ვარა.
ნიკოიაში დუდამი
ასე ვარე ჩქჷნი ფარა.
უმუშელას პატის ვაფცენთ,
ხოლო მოხანდეს-და ვარა.
ასე ირდიხას ინჯამუ
ჩქჷნი სიმართეში კარი;
ჩქჷნი ოთხილუს გერე
ჭითა არმიაში ჯარი.
არძა მუშა, ახალეფი,
არძა ქილინა მანგარი.
არძა ართჷგური, მარჯვე
დო ტერიში მოლჷმარი.
მუშა, მარგალიში სქუა,
მა უზალა გომორძგუას,
მოხანდე კათას ირდიხას
გურაფა დო ჯგირობუას.
მუში გურაფა დო რჩქინათ
ტერიში აკოსოფუას,
ვაშა, მუშაში გაგებას,
თიში მუმალ ჯგირობუას!