მა დო სერი (ლანდა მასხულია)
ასე, მუჟამც თე ტროფის ბჭარუნქინ, შქა სერ იჭუ, იწიროდუ,
ოკუმალეშ მასქურია ელიეფიშ არიკის მირაგადუ.
თუთათ ნაფორი ქიანა ვეკიოთანს ვარჩხილიშ შქართუნს,
მასქურ ურქენს დო უტოკენს ოკუმალეშ იასამუნს.
ცა ტორონჯიშფერ ცაშფერ სეტით თეშითი–რე დოსერილი,
თეში რენი ეფშა შურით, მუჭო რიფმეფით თე წერილი.
ოდუმალი სინთეთ ორე თეში რენი დოსურდილი,
თეში რენი ეფშა ძნობათ, მუჭო ამსერი ჩქიმი გური.
ბერლ ხანი–რე ოდუმალეს მა გურისი იფჩუანქი,
მითინს ვაურაგადუქ დო ბორიასუც ვემკვონჭანქი.
მუ უჩქუნა ჯიმაკოჩეფს მუსუც ინტირუანს გური,
ვარა მურე თიშ ოწორეს საუკუნო ჩუალირი.
ვეთახირე გურიშ ფიქრის წუთი წუთშე უწონდესი
ოდუმალეს ვემდამიღანს ცირაშ ხუტოლ დო ალერსი.
ვართ რულიშ დროს ნელ ოხრუა დო ვართ ჩაყვა ღვინიშ ლირსი,
ვემდამიღანს მა თინასი, გურიშ ტომბას ჩუალირსი.
ხვალე სერის, ურულობაშ დროს, ოკუმალეს მოსერსერის,
უჩქუ ჩქიმი ოდუმალე, ირფელ უჩქუ ჩე–ჩე სერის.
უჩქუ მუჭო დობსქიდ ხვალე, მუჭო იმგარ დო იმწერი,
ჩქი ჟირ ვორეთ თე ქიანას, მა დო სერი, მა დო სერი.