მა დო სერი (კოტე ნაჭყებია)
ჸათე ლაწკარს ბჭარჷნქჷნი შქა სერჲ ორე მანდღულაფუ,
ჩქჩქჷ ბორია ოჩხორიეს ვეშჲ არიკით მიკილაფჺ,
თუთარჩელაშჲ ნაველასჷ ელმოლსჷ ვარჩხილქ ვადათხინუ,
ჲასამანიშჲ ჭკუჭკა ტანს ჭარკჷნტია აშერხინუ.
ტორონჯიშფერჲ ჯღარჺ სმეტეფით ცა თეში რე გჷნანჭალა,
თეშჲ რე გოფშა გინაფათჷ , მუჭოთ რითმათ თე ნაჭარა.
ონაფულე ჩხორიათჷ არე თეშჲ რე გოსურდული,
ეფშა მორღვა გინაფათჷ, მუჭოთ ამსერჲ ჩქიმი გური.
მუ ბორჯი რე ონაფულე მონკა გურით გილამღუნი,
მითინიშა ვემანწყინე, ქუაცალო ალახუნი,
ჯიმაკათას მუ უჩქჷნა მუ ლაბანით ვორექ გოფშა,
მუ ზოჯჷნსჷ თიშ წყურუმსუ სადღამუშოთ ინნაფორჩა,
გურიში ფირქი ვემდაღინე ბორჯეფიში ჰამო გაფასჷ,
ონაფულე ვემიახირე ვართჲ სქვამჲ ცირაში მოფერაფასჷ,
ვართჲ კუსაფის რულიშჲ წოხლე, ვართი ღვინითჷ ეფშა ჩაყვასჷ,
ვემდაღინე გურიშჲ ქვინჯეს მუთჲ მაფუნი ინნაჩაკა.
ხვალე სერს, ურულჺობას ოჩხორიეს მორინელს
უჩქჷ ჩქიმი ონოფულე, ირფელჲ უჩქჷ ველირჲ სერსჷ,
უჩქჷ, მუჭოთ მაწამესჷნი დო ომბოლო დომტესჷნი,
ჩქი ჟირჲ ვორეთ ქიანასჷ, __ მა დო სერი, მა დო სერი.