მებონდღილო რაგადელი
ქუა ირახვალ, ცა ჭვეთანს,
ჩეგვალა ინგარს,
ღურელეფქ ირტეს ოხვამეშე
ციორ–ციორით,
მუკილოთ ამბე ჩე სერეფშე
უშულად ინგირს,
შურინუნს მასქურ უძირაფშე
შქიორ–შქიორით...
ვენტირენა ღურელეფი
სისმარეფიში ქიანას,
გეგნურთუნა ოშურეთი
ტყურაია ხიოლით,
გიოჭვენა ზისხირეფი
უთანაფუ თანაფას,
ფინქრი ურთანს ოფუტეს
კარკანტით დო რსიოლით...
ეკობთხოზუქ ღურელეფს,
პიჯ ურღიმანს საფულეს,
ჩილამურიშ ჸოროფაქ
მელერსეფს ვაფულეს...
ქუმონტებუ ჭურიასი
ჭითა ჩხანაშ ჭართალით,
მიკივალნა არიკეფი
ამარ–ემერ ხართალით...
მაფა, მაფა, მაფაშა
დუგაღორენქ აკაშა,
გონჭყაფუა ჭაკი ცხენს–
მებარებულს ძაკაშა...
ათე ჭინკექ სო მატყობ
ვითომიათ მართალქი,
მუ უღუნა, გოლვაფირო,
სერ დო დღაშის გართალი...
მეურს, მეურს, მიხიბოკუ
ბორჯ დღალეფით რაბადელი,
არიკშორო ტყურა ჸოფე
მებონდღილო რაგადელი...
მოუღ ამბე ჩე სერეფშე
უშულად ინგირს,
მოკვარჩხილ რე თე ქიანა,
ონგარალს იბირს...
ოკოცუ დღალეფქ,
აკონდღულ ნჯარეფქ,
ღურელ რაგადანს,
იბრჩქილექ ირფელს,
ვორწყექ ირფელს,
ცოდა რაქვალანს!..
ეშმაკეფ შორშე მიჯინენა
ძიცა–ხიოლით,
ღურელეფქ ინტეს ოხვამეშე
ციორ–ციორით...
გომთანე მალას, გომთანე მალას,
ჩხანა–ჩხანათი,
გომიტეთ ცაშა, გომიტეთ ცაშა
შურიშ ჭყანათი!..