მისჷთ შარა მერჩამუნი
მისით შარა მერჩამუნი
ზუგიდიშე ბჟაიოლც,
ჯვეში სოფელი ჭაქვინჯი რე
ხვალე ჟირი სათიშ ოლც.
ვით ვერსითი ვაილჷნა,
ქალადირთი დიკოხონცჷ,
ქოძირითჷ უძირაფუ,
ვაუჯერთჷ თქვანი თოლცჷ.
მუკი-მუკი სუკეფი რე
მოთინილი ფალო ტკილი,
ბაბუშობაშ ცურუეფით
გობონდღილი, გოფინილი;
ცაშა წვანდი უნჭუნ ფერი –
არძო შხუ დო არძო რჩინჷ,
სუკიშ წვანცჷ ფუთქურამი
ცხიმურეფი მუკორშვინჷ.
ჟირ საჯენიშ მაჟიაშე
ემერ წყურგილი მოსოფუნცჷ,
გვართა-გვართა მუკმოხორცქჷ,
უკულ კიდას მიკოფუნცჷ,
უკულ ტკილცჷ უზოგარო
გიანთხუ დო გვარგვალანცჷ.
ჯუნუნც ჸოროფილიშორო,
ბონუნცჷ დო ხვარჩალანცჷ;
თუდო ქვიშა ვარჩხილიში
ეთმოცენცჷ, ვარკალანცჷ.
ბჟაშ ჩხორიას გემშუტყობუ
შქასჷ მიშაბარჩხალანცჷ
გიჯინექჷ იშო-აშო
დუუგარძღუ შური, გური.
ხეშქაგურიშორო მოჩქჷ
ჯვეშ ოხვამე წენდიხური;
ჭითა გვალა, თუდო სქური,
ნაოხვამუ ობუჯური,
ჯვეშ ბორჯიში მოჭიშეფი
ამდღა არძო უმინჯური.
მუხური – ნაცხა გოჭკადილცჷ
უჯინექჷ კარაკანო;
მინდორი გინოსილონგირი
გოფაჩელე შხვა აკანო;
თუდოლეშე შორც იძირე
ურთა, თეკათი დო ეკი,
ჟიმოლოშე გვალას გვალა.
მუნორცხილი ეკი ეკი.
სკან წოხოლე სუკი გერე,
შხვასჷ მოხარცქაფილი,
სუკო კოჩი ვადაჸოთა
ხეთჷ გიჩქჷ გაფილი,
გინმიჯინე კანდიორო
სქვამი, მოჸუნაფილი,
ჯვეში ჭაქვინჯური ჯიხა,
თელ ოდიშის ცქვაფილი.
მაღალი კიდა გინოჭყვართ,
გახუტოლჷ სუკიში დუც,
ქარიატაშა ონჭუნ ფერი
შქა-შქას ყორშეფი აშაჸუნც.
ფუთქურითჷ გოფორილცჷ
ცურუში ნაბადი გინაქუნცუ;
თუდო სქვამი ჭენი წყარი
ლენტიშორო მუკოჸუნცუ.
კოჩიში თოლქჷ მუ ძირასჷ,
თეში მანგი ოძირაფუ;
დღა დო სერი უჯინენი
კინი ჯინაშა გური გაფუ;
ულირ ბორჯიში სქვამი ლანდი
სქანი წოხოლე გილეფაფუ;
შური შხვადო მინჭუაფუ
სოდგენი შორცჷ ილაჸაფუ,
ირფელი თეში მაძირაფუ
მიკართუქჷ დრო ულირცჷ
დო იფირქე ამდღათ ვორდათ
მუ იჸიი, მუ უჭირცჷ.