მურიცხიქ სოდეთ ეირზუნ
მურიცხიქ სოდეთ ეირზუნ,
თექ ოკო შქირტას.
ირიათონ- ირიათონც აფჷ მიკორშვილი,
დო თიშ იშო, ირფელ უგნუთირუო დუთმოსქიდჷ.
გოშინა დო მერქაშნერ ნარზა
ჩე დღაშ შური რე, უჩა სერც ეშუოლუნ.
კოჩი წვალენც-და- ჯა ხოლო წვალენც,
ანგილოზეფი ივარვალუნა, ბჟაშ ამნახანტი გინოძუნა
დო მუნაფას ხილუას აწმუხანტანა.
ცაშე გითოლაფირ კაწაბცალო წკუმინუნც
ჩქიმ ორაგადე.
ლური ქვერსემი დარანი ჸოფე, სოდეთ
ინულა ვა მილამუე ოკო.
სისმარ ჩხომშორო გოიზგირტუ ხეშე,
დო შხვა ფოთქვის მიდგარენც გოუველუნც,
ის თელარა დო რინა აჩქვენუ
ჩხომიშ კუდელ ქასქიდუ ხვალე ხეს.
სოთინ ვა დაქანცინე, ირო ართის ორწყედას იჸუაფჷ.
ბორიას მიარჩქილას ოკო კოჩქ, ბორიაშ იშო შურიშ ღალას
იგინანც,
იგინანც გინოთირელეფიშ ციონს, თელეფიშ ფუცქინც,
ბორიას ძირაფა ვაკო, ბორიაშ ინოხ ოკო ჯინა,
თექ ითირანც ორთა ჟირნერ სქილედის.
ბორჯის ქვერსემ პიჯი გოუნჯამჷ,
ქომუდგინაფჷ ოხვარჩალაია ზალამეფიშ წყურგილე.
წყურგილე, წყურგილე რე მარა,
ჩქიმ ზისხირ ხოლო გეშუშუმჷ
დო მურიცხშა ხოლო გელუშქირიტჷ თე.
ირფელც ართ ხე ურსიოლუანც,
მუმალ, მაულარი თე ხეს უჯინე.
მახოლო თე ხეს აშემჯირ დუდშე.
უკულ მეფხვადი მუ რდჷ წკვერეტიანი,
ფარფალიეფც ვუჯინ დო
რინაქ იშენ უმოსო მეჸოროფჷ.
არძას ათე ხე გინობთირანა,
თე ხე შილებე
გვალო გოღა ოჭკომალს გიხაზირენდუკონ.
რჩინჷ ოსურიშ ხე რე თენა,
მინშა ქომოლ კოჩიშ ხეთ გაძირუაფუდას ეგება, მარა
მუ შან უღჷ,
ხე რე დო გეთუ
მუნაფას თინა ალაიკუჭუანც
დო დიხას ხოლო თინა მუნგორღვანც,
გორჩქინდუნქ მუზმაშა იჸინ,
კინ თიშ სქუა რექ.
გუგორჩქინანც.
ირიათონ- ირიათონც მიშაშილ რე
დო გედირთი ასე სი,
ათე ცორქო დიხას
თელარა ქუდარსხი.
მუ შან უღჷ
სოლე მოულუნი.