მუშენ მაჭუნა ნინა
მუჭო ოხიოლჷ გურს, მუჟამც შხვაშ თური კათა, სქან ნინაშა, ჟირკაკალია ზიტყვათ რდასინ ხოლო, გინოირაგადუანსინ. მოურს დო ოცადჷ, მუდგათ იჸინ, სქან ნინაშა აკა ზიტყვასქვილია ვარა ქოიწუასინ… თე შვანს, ჸოროფათ ეთმიფშაფუქ კოჩი, ათენერ კათაშ მეხჷ. სქან ნინაშ ჸოროფა ხოლო უმოსო გეარგამებუ, სქან დუდიშ რწუმა გენძალიერებუ. გოხიოლჷ ირფელი, მუშენ-და თი კოჩქ დო ვარ ოსურქ, სქან გურიშ სიმეფს ქიმკულაჸაფუ, სკან შურს ქინანჭჷ, გუგოტიბუ, სკან პატიცემა გეგმოხანტჷ… მუშენ ხვადუ თაშ? მუშენ ეთმიფშაფუქ უგშუჩინებუ ხიოლით თე შვანს? თიშენ ხომ ვარ, ნამდა ნინა თინა რე, ნამუდგათ სქან ბაღანობაშა, დადი დო ბაბუშა დორთა შეგილებუნ? ჸუჯის ელგორაგადანს წანეფმუკულირი ხონარეფი: “ბებიქ ქუგგალუ”, “სქანი გოლუაფირი”, “კუჩხი ბედინერი”, “მოზოჯით ნანა”… ალგარჩქილე, წყარმალს ცირა-ბოშეფწკუმა ართო ეკოლაჸაფინიშ ხონარეფი, ალგარჩქილე ჰამო არიკეფი, ყებურს მოთხობელერი უნჩაშეფშე… არძო ნინა ათაშ რე, არძო ნინას ჸუნს მუში ჰამო ბები დო ბაბუ…
გლახა ნინა დიხაუჩაშ ჟი აკა ვა რენ თის, თიმწკუმა გოფხვადი, მუჟამც ჩქიმი აიშახ გიოძიცაფალი თურქული ნინა დიბგურენ. ჯგირო ფშჷ, მუდგარენ ბუდი-ბუდის ეკმიფშკვანდი პიჯშე დო ბღურუდით ძიცას ბაღანეფი, თურქულო იფჩიებუქ მაქ დო. ვა მოგინუდეს. ქიდიბგურე ნინა დო ქიბგინი, მუჭო ფჩირთუდინ, ქიბგინი თიშ სიჰამიე, თიშ სისკვამა… ონჯღორე ქიბგინი. ქოგოფხვადი ნამდა არძოს, მუში ნინა თეშ უჸორს, მუჭოთ ჩქი მიჸორა, ჩქინინ. თოლშა აწომირე ჩქიმი თურქი ლექტორი, ნინას მოგურუანდუნ, ჰარმონიული ნინა რენია ჩქინი ნინა დო მოჸუნდჷ ზიტყვეფს, ეთმონწყუნდჷ, მოძირანდჷ მუში შურს. შხვაშიშ ჸოროფა რე კოჩანა, ვარა მუშის ირკოჩი იჸოროფუანს, მუში ირკოც უჸორს… შხვაშა ხუჯიშ მეჩამა, შხვაშ ალარნა, შხვაშ ნინაშ დო კულტურაშ პატიცემა შეგილებუნ, ეთინა რე კოჩიშობას არზუანს ჸოფირენსინ.
სი მუ გოჭირჷ სი ხვამელი, ჩქიმი (სკანი…) ნინაშ მორჩქილაშვანს ბუძგურია გუგორენ, თოლეფშე ზისხირ მუგანტუ დო თეშ მიჯინექ, მუჭოთ ლაბანამ გვერსინ? ართი კათა დო ართი ჯიშიშ ვორეთ თენა ქომჩქუნა-და, სი თით უმოსო ვემიჭოფენიო ოკო თე ნინაშ ჸოროფა? ჯგირი, ჸოროფა ვა შეგილებუნ-და, ვეგიჯოგუენ, თენა ვარა ვა შეგილებუნო? მუდა უკუნი რე მობღვარანთ, ართ ვორეთ, ართ ქიანა მიღუნა, ართიანიშ გურშენ ვორდათ ოკო დო ართიანს მეფჩათ ხუჯიან, მარა სი იშენ ორცაშე გითმოჯინექ, მუჟამც ჩქიმ ნინა გარჩქილენ. იშენ ვა მონდუქ, იშენ სეპარატისტის მიძახუქ, იშენ რუსი დო ხოლო მუდა ვათანძარობას ეკმიშკვანქ პიჯშე, ხვალე თიშო, მა დუმაჩიჩიე დო ჩქიმი ნინაშა ოჭიში მორთინაფუე დო გუმოჭყოლიდაფუენ. გოკო სქან რელსას გიმორინუე მა ხოლო, გოკო თი შარას გიმორინუენ, ნამდგასით სი გერექინ, სქანნერ გოკო ვორდე ირფელამო დო მუთუნ გინორთი ვა მიღუდას სქანდენ. სი ხვამელი, რელსეფი ვა გიძირუნო, ვიშო-ვიშო, შარა-შარას ართიანს გინმარსხუნან? მუ არზი უღჷ, ნამ რელსას გებდირთუთინ, შარა ართი ქორენ-და? თინა ქომჩქუნა, საბოლა მიოლი აკანი სო რე დო სო ოკო მეფრთათინ-და? სო ოკო იპონათ ჩქინი ქიანა-და? ვარი, ჩქიმი ნინაშ დაჩიჩიებათ სი, დუც იჩიჩიენქ, თი წკონდა წყუს ლანდღუნქ, ნამუდგათ ჩქინ, სანარღოთ უკვე ლანდღვირი ნინა, იწკონდირებუნ, ირდუნ… ჩქინ ვარენო შონური ნინა, ჩქინ ვარენო ლაზური, მარგალური, ქორთული? გიშმაკოროცხუნსო თენეფი ართმაჟირას? ოცილუნო თენეფი ართიანს, მუთუნს? დო ვარ პიჯიქილე, ართიანს რდუნა? მუს მომიღანა თენა მა დო სი? სო მემიჸუნანა თენა? მემიჩქუნ, ქირქეშა დო ეთი ქირქეს გეგნობლუთინ, უკულ იმნგარათ დო ფრჩხვიუათინ ინა, (შურო ქიპით თიშ არზის, ორჩხვიალ დო ონგარლ მაფუნან-და), მუთას მოხვარუნა…
2014 წანა, ღურთუთა.
ზუგდიდი.