მუშო გოკო ჭოკაშორო
მუშო გოკო ჭოკაშორო
აშარდე დო აშეპონე,
ანჯა ვაგაპალუდასჷ,
ვაიღუდას შურიშ ჸონე.
გოშინეფიშ ქოქა ჯაშე
ჯაბ მუნტურელ ეშეჸონე.
თე ხიოლიშ ჭვემა სო რე,
ვარა ტანი ქაშებონე.
ირფელქ ოჭიშ ქომირთინუ,
ხვალე ვამოთხიუ ქიღუ.
ძივთუანი მუთ ქორდუნი
ირფელ წანეფქ მიდამიღუ.
სალამუსოთ მუთ დოფჩვინი
ნწალ-ბორიაქ გეშამირღვუ.
ბულიცალო ჭუა ჭვიანს,
ჭვე ეშმურცუ ჭუაცალო,
რინა აკოკირილი რე
ცხენიშ უჩა ძუაცალო.
სო დობლუქუნ თინათ ვამიჩქ
ნაჸოთემი ქუაცალო.
კინ გოშინაშ ხუმლა ჯასჷ
უკაკუა მუჭოთ კიდუ,
წანეფქ მუთუნ ვადმოტუ დო
სქანოთ მუთუნ ვამოსქიდუ.
ჩქინ ჸოროფაშ ძაფის ხოლო
აკაბურცხა ვაუკინდუ.