მუჭო რშვენს ცირა თე ელამოსა
მუჭო რშვენს ცირა თე ელამოსა,
ჩელაშ ფერს ჭითა ტერტებით გონწყირ.
ბობრ თომამ ოძირაფე ცათმოსა;
ბრელიშ გურს ინახანტუქ თაშ მონწყირ.
შვენა დო ჩელა სკან ოსკუნ ფერიშ,
სვისვალ ლარწემიშ მანგო რექ ენწყირ.
დიგორას ოკო ბოშქ სკან ოფერიშ,
რდას აკოწორუა ამოთ გენწყირ...
ხილონაშ ცქვაფა
აფუნიშ ბოლოს მონდუ ბულ
დო გურ მაფჷ გახარებულ.
თეშ უკულ მონდუ უჩა ჯაპ
სი ბირა გიჸორდას დო სხაპ...
ეყვიღარებე ბაშმალა
იხანდ კოჩურო მამალას.
მონდაფულენს სხულ დო უშკურ _
მა ამოს ბგინენქ დო ვა მოშკურ.
ოზეს ასკვამანს ატამა,
ბხარენქ დო გურ მიღჷ თამამას!
მოჩქჷ ფართე ფურცელამ ლუღ
მიოტე ჭიროთა დო დღურ.
რანწკო ჩანს თხირ დო ფეიხო,
ბრელ წანას სი ხოლო ვეიქო?
ნოჸელეფს ამოკანს ხომა
იხარ, ირდ დო ვა გოხომა.
ღანდაწკმა მიჩანს სკუმუნტურ,
ვენკახე ჭითა მუნტურ.
ხილონას უღჷ მუშნერ ცქვაფა
დო იჸუაფჷ ოზეშ ხვამა.
არძა ხილ რე კოჩიშოთ მოღე,
დიდება ნამუთ რე ომოღე!
კოლხურ შურ
კოლხურ შურ , ბერეხ შურ
რე იბერთწკჷმა ართ თურ.
ურჩქინათ ისოფჷ გურ,
დიდებას მიორე ლურ
ბჟათ გოფალუნს პალურ,
იბტალენს მოკა დღურ.
გოფალუნს კოლხურ შურ
ბერეხაშ დო ჯგირაშ თურ!