მუ შანი რე
მუ შანი რე, მუ რჯოხონი,
გოკონ ქორდა იოთამი.
ირფელ ოკო დოწიკვანი,
ირფელ ოკო მიჸოთანი.
ართი შარა ვითო ირთუ,
ჯგირი, ფური წყორილი რე,
სინთე შარას მიკაჩირთუ,
უჩათ ინოფორილი რე.
ბორჯი ხასლას ქალმაჸუნი,
ვარა, შურო ქუმართია.
ნოთე სო რე, მედინაფე,
ნოშქერელი კუმაშ თია.
მუნაფეფი ქუაშორო
გეძუნა დო აწოხუნა.
თუთას ოკო მურიცხეფიშ
კინ კართეშა აწოხუნა.
ირფელც ფერი მედინაფუ,
პეულც ოკო მორცხინუა,
ჩქინი შურიშ სო რე სინთე,
ვარა ჭიჭე გორწკინუა.
თე ოფუტე ვადოჭყაფე,
ოდიარე, მოთიფუე,
ჩქიმი გური ნორღვა რე დო,
სქანო რენო მოტიბუე?!
ნარღის ოკო ღვინიშორო
კინ დუდიშე მონქირაფა,
ჭუას ოკო გონწყუმა დო
ზისხირ ცალო მონქირაფა.
იჯინ ეშე, იჯინ გიმე
დოხორე დო ქოხია რე,
სოდგარენი ეფშა რენი,
ჭიჭე ინოტოხია რე.
დისერუ დო სერი ვარე
ოჭმარე დო მოღია რე.
მუთუ რექუნ, თინა რექუ,
შხვა იშენი ვარე თარი.
ხოლო ცას ელაჯინი
ცა ჩეთჷ რე მავალარი
ართ ჰალამო გორსოფუნსუ
სი თიშო რექ ლილა ძაფი.
ლერსის ზოხო ჯინა უჩქუ,
ცირაშნერი კილარზაფი.
წიმი ულა დიგურე დო
თირი ოკო გეკოხარე,
უკულ მურე, ხვალე რექ-და,
ხვალახობა გეკოღვარე..
ბორჯის ხოლო შურ ეშმალუ,
ჭიე-ჭიეთ შირშინითუ,
რინაქ წირეს ქინმოკილეს,
მარა შხვადო დიფშირითუ.
ე ოფუტე შურო ვარდუ,
მუთ მიბძირე ეჩინერი,
ირფელ შორშე იძირედუ,
მი მიშო რდუ მერჩქინელი.
ასე ათაქ ვორექ მარა,
მა ვაბჯოხო ერჩქინელი.